भांगरभूंय | प्रतिनिधी
प्रवीण आर्लेकारः निगळ्यां गणपती विसर्जन सुवातेची नितळसाण
भांगरभूंय । प्रतिनिधी
पेडणें: पेडणें मतदारसंघांत ज्यो ज्यो समस्या आसात त्यो प्राधान्यांत सोडयतलों. लोकांनी त्यो आपले नदरेक हाडून दिवच्यो, अशें आमदार प्रवीण आर्लेकार हांणी सांगलें.
निगळ वाठारांत मोपा सड्या वयलें पावसाचें उदक येवन सगळे कडेन माती, फातर आनी चिखल जाल्लो. चड करून गणपती पावोवपाचे सुवातेचेर माती आनी फातर व्हड प्रमाणांत येवन सांचिल्ल्यान ह्या वाठारांतले गणपती पावोवपाक भाविकांचे हाल जावपाचे. लोकांनी ही समस्या आपले नदरेक हाडून दिले उपरांत आपणे ताकतिकेन उदक शिंपणावळ खात्याच्या पेडणेंच्या अधिकाऱ्यांक आदेश दिवन ही सुवात नितळ करपाचें काम हातांत घेतलां, अशें ह्या कामाची पळोवणी केले उपरांत आर्लेकारान सांगलें.
दोन दिसांनी हें काम पुराय जातलें. हे आदींय हे सुवातेचेर अशेंच तरेन माती आनी चिखल जाल्लो. त्या वेळार आपणें बोल्सांतले पयशे मोडून ती सुवात नितळ केल्ली. पेडणेंकारांच्यो समस्या सोडोवपा खातीर आपूण सदांच मुखार आसतलों, अशें आर्लेकार हांणी सांगलें.
ह्या वेळार तांच्या वांगडा थळावे खाजने- अमेरे- पोरस्कडें पंचायतीची उपसरपंच सिद्धी गडेकार, समाज वावुरपी मधू पेडणेंकार, सुजीत गडेकार, आतीश गडेकार आनी थळावे लोक हाजीर आशिल्ले.
गणपती पावोवपा खातीर भाविकांक जावपा आशिल्ल्या त्रासाची कल्पना दिताच आमदार आर्लेकार हांणी संबंदितांक आदेश दिवन सुवात नितळ करपाचें काम हातांत घेतलें. हे खातीर आमदाराचे उपकार, अशें सिद्धी गडेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
