सप्ता निमतान वास्को येरादारींत बदल

भांगरभूंय | प्रतिनिधी

वास्को: सप्ता निमतान वास्को शारांतले येरादारी वेवस्थेंत बदल केला. भाविकांची कसलीच गैरसोय जावची न्हय हे खातीर वास्को येरादारी पुलीस खबरदारी घेतात.

सप्ता निमतान स्वातंत्र्यपथ 3 ते 9 ऑगस्ट मेरेन येरादारी खातीर बंद दवरला. सेंट अँड्रयू चर्च चौक ते आयओसी चौक मजगतीं येरादारी करूंक मेळची ना. तेच प्रमाण फा. वाझ रस्त्यारूय फेरीची दुकानां घाल्ल्यान बॉम्बे ऑटो पार्ट ते पोरणी वीज कचेरी मजगतचो रस्तो येरादारी खातीर बंद दवरला.

शारांत येवपी आनी शारा भायर वचपी वाहनां एफएल गोम्स मार्गा वयल्यान येरादारी करतलीं. ह्या मार्गार खंयचेच वाहन पार्क करूंक मेळचें ना. कदंब बस स्टॅण्ड, तानिया हॉटेला मुखा वयले मेकळे सुवातेत, तशेंच टिळक मैदान, भारतीय स्टेट बँके कुशीच्या भितरल्या रस्त्यार पार्किंगेची वेवस्था केल्या.

3 तारखेक सकाळीं 10 ते 4 तारखेचे रातीं 12 वरां मेरेन अवजड वाहनांक शार वाठारांत प्रवेश बंद आसतलो. तेच प्रमाण 5 ते 9 ऑगस्ट मेरेन दनपारां साडेचार ते रातीं 10 वरां मेरेन शार वाठारांतल्यान अवजड वाहनांक येरादारी करूंक मेळची ना, अशें वास्को येरादारी पुलीस निरिक्षक शैलेश नार्वेंकार हांणी कळीत केलां.