सनबर्न ३१ डिसेंबराक जातलो??

भांगरभूंय | प्रतिनिधी

म्हापशें, प्रतिनिधी : पर्यटनमंत्री रोहन खंवटे हे ‘२८ ते ३० डिसेंबर अशे तीन दीस सनबर्नाक ‘ना हरकत’ दाखलो दिला अशें सांगतात. जाल्यार दुसरे वटेन सनबर्न आयोजक तांच्या अधिकृत वेबसायटी वयल्यान २८ ते ३१ डिसेंबर अश्या चार दिसां खातीर तिकेट बुकींग करतना दिसतात. ताका लागून सनबर्न महोत्सव वादांत सांपडला.
मुंबय उच्च न्यायालयाच्या गोंय खंडपिठान पोरूं आयोजीत केल्ली सनबर्न कार्यावळ बेकायदेशीर आशिल्ल्याचें दोन दिसां पयलींच सांगिल्लें. ह्या महोत्सवांत जावपी बोवाळ पळोवन उच्च न्यायालयान ‘एक समिती स्थापन करून अश्या महोत्सवाविशीं निर्णय घेवचो’ असो आदेश दिला. तशेंच कांय मार्गदर्शक तत्वांय घालून दिल्यांत.
हे विशीं मंत्री खंवटे हांणी म्हायती दितना सांगलें, मुखेल सचिवांचे अध्यक्षते खाला एक समिती स्थापन केल्या. हे समितीन सनबर्न सुरळीत जावपाची तयारी केल्या. मजगतीं, थळाव्या लोकांनी ३१ डिसेंबराक जावपी सनबर्न आयोजनाचेर आक्षेप घेतिल्लो. तशेंच पर्यटन खात्यान २८ ते ३० डिसेंबर मेरेनच्या पार्टीकूच आयोजनाक ‘ना हरकत दाखलो’ दिला, अशें मंत्री खंवटे हांणी स्पश्ट केलें.
मात, पार्टी आयोजकांनी ३१ डिसेंबराच्योय तिकेटी विकपाक दवरल्यात.

पर्यटन खात्यान सनबर्न आयोजकांनी वेबसायटीचेर दिल्ल्या जायरातीं विशीं कांय सांगूंक ना. पूण ३१ डिसेंबराक सनबर्न जातलो अशी म्हायती दिवपी एका संकेत थळाक नोटीस धाडपाची तयारी पर्यटन खात्यान केल्या. ‘पर्यटन खात्यान २८ ते ३० डिसेंबर अशे तीन दीस सनबर्नाक परवानगी दिल्या. वेबसायटीचेर पोस्ट करून फटींगपणा चलयल्यांत. तांणी ही म्हायती खंयच्यान मेळयली हाची जाप विचारले. तांकां नोटीस धाडटले,’ अशें मंत्री खंवटे हांणी सांगलें.
उत्तर गोंयचे अधिक्षक निधीन वाल्सन हांणी सांगलें, सनबर्नांत ड्रग्साचो वापर आडावपा खातीर पुलिसांचे विशेश पंगड तयार करतले. परवानगे विशीं स्थापन केल्ले विशेश समितीची बेगीनूच बसका जातली.