भांगरभूंय | प्रतिनिधी
भौशीक बांदकाम खातें उरतलें मुख्यमंत्र्यां कडेनूच
भांगरभूंय । प्रतिनिधी
पणजी: आलेक्स सिक्वेरा हांचो आस्पाव मंत्रीमंडळात जाले उपरांत मंत्र्यांच्या खात्यांत बदल जावन फेररचणूक जातली, अशी चर्चा आसली. हे चर्चेंत कसलेंच तथ्य ना. सध्या तरी मंत्र्यांच्या खात्यांत कसलोच बदल करपाचो प्रस्ताव ना. भौशीक बांधकाम खातें हेर कोणा कडेन दिवपाचो प्रस्ताव ना. तें मुख्यमंत्र्यां कडेनूच उरतलें, अशें मुख्यमंत्री डॉ. प्रमोद सावंत हांणी सांगलें.
आल्तिनो बंगल्यार पत्रकार परिशदे उपरांत मुख्यमंत्री डॉ. प्रमोद सावंत हांणी ही म्हायती दिली.
नोव्हेंबर सोंपपाक निलेश काब्राल हांकां काडून तांचे सुवातेर आलेक्स सिक्वेरा हांकां घेतलो. निलेश काब्राल हांचे कडेन कायदो, पर्यावरण, भौशीक बांदकाम हीं खातीं आशिल्लीं. तातूंतलीं पर्यावरण आनी कायदो हीं खातीं आलेक्स सिक्वेरा हांकां दिल्यात. भौशीक बांदकाम खातें मात सिक्वेरा हांकां दिवंक ना. भौशीक बांदकाम खातें मुख्यमंत्र्या कडेनूच आसा. भौशीक बांदकाम खातें हेर मंत्र्याक दिवन मंत्र्यांच्या खात्यां मदीं बदल जातलो, अशी चर्चा आशिल्ली. भौशीक बांदकाम खातें हेर मंत्र्यां कडेनूच आसपाक जाय, अशें काय ना. ते मुख्यमंत्री लेगीत बरे भशेन हाताळपाक शकता, अशें मुख्यमंत्र्यांनी सांगलें. लोकसभा वेंचणूक लागीं पाविल्ल्यान उमेदवारी खातीर इत्सुकां कडल्यान दावे करप सुरू जालां. दक्षीण गोंय मतदारसंघ जिखपा खातीर भाजपाचे यत्न सुरू आसात. आलेक्स सिक्वेरा हांका मंत्रीपद मेळ्या उपरांत साश्टींतल्या एका आमदाराक मंत्रीमंडळात सुवात मेळटली, अशी चर्चा खूब तेंपा सावन चल्ल्या.
मंत्रीमंडळांत आनीक बदल ना
पोरूं स्वतंत्र गट करून काँग्रेसींतल्यान भाजपांत आयिल्ल्या आठ आमदारांतल्या फक्त आलेक्स सिक्वेरा हांचो मंत्रीमंडळात आस्पाव जाला. आनीक दोन मंत्र्यांक काडून दोन आमदारांक मंत्रीपदां मेळटलीं, अशी चर्चा आशिल्ली. ही शक्यताय मुख्यमंत्र्यांनी न्हयकारल्या. मंत्रीमंडळ आनी मंत्र्यांचीं खातीं हातूंत बदल जावचो ना, अशें मुख्यमंत्री डॉ. प्रमोद सावंत हांणी सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
