भांगरभूंय | प्रतिनिधी
वांतेंचो रस्तो व्हांवलो; नाणूस वाठारांत घरांत उदक घुसून लुकसाण
भांगरभूंय । प्रतिनिधी
वाळपयः दोन दिसां उपरांत परतून एकदां सत्तरीच्या खूबशा वाठाराक पावसान झोड दिलो. वांतेंच्या वयल्या वाड्या वयलो रस्तो व्हांवून गेलो. ताका लागून थळाव्या लोकांक व्हड प्रमाणांत समस्या उप्रासपाची शक्यताय आसा. तशेंच नाणूस वाठारांतल्या रस्त्याचेर व्हड प्रमाणांत उदक सांचिल्ल्यान लोकांचे हाल जाले. थंयच्या कांय घरांनी उदक घुसून कांय प्रमाणांत लुकसाण जाल्ल्याची म्हायती मेळ्ळ्या.
मेळिल्ले म्हायती प्रमाण सुमार दोन वरांनी 2.50 इंच पावसाची नोंद जाल्या. अचकीत सुरू जाल्ल्या उटंगाराच्या पावसाक लागून म्हालांतली लोकजीण विस्कळीत जाली.
फाटल्या सप्तकांत शुक्रारा दोन वरां पडिल्ल्या पावसाक लागून वाळपय शारांत गंभीर स्वरुपाची समस्या निर्माण जाल्ली. वाळपय शारांत व्हड प्रमाणांत उदक सांचून खूबशा दुकानांतल्या सामानांची नाशाडी जाल्ली. तशेंच वाळपय सरकारी समाजीक हॉस्पिटला मुखा वयलो रस्तो उदका पोंदा गेल्ल्यान येरादारीक आडखळ जाल्ली. दोन दिसांनी परतून एकदां वाळपय शारांत उटंगाराच्या पावसान हाजेरी लायली. ताका लागून सत्तरी म्हालांतल्या खूबशा वाठारांतली लोकजीण विस्कळीत जाली. हाचो चड मार वांतेंच्या वयल्या वाड्याक बसलो.
आयतारा पडिल्ल्या पावसाक लागून वांतेंच्या वयल्या वाड्या वयलो रस्तो व्हांवून गेलो. सुमार 100 मिटर अंतराचो रस्तो व्हांवून गेल्ल्यान थळाव्या लोकांक अडचण जावपाची शक्यताय आसा. गटारां तुंबिल्ल्यान पावसाचें उदक रस्त्या वयल्यान व्हांवतालें. हें उदक आडावपाचो थळाव्या लोकांनी यत्न केलो, पूण तो फळादीक जावंक ना. खबर मेळटाच थळावे सरपंच उदयसिंह राणे घडणुकेचे सुवातेचेर पावले. वाळपय भौशीक बांदकाम खात्याच्या रस्तो विभागा कडेन संपर्क करून जाता तितले बेगीन ह्या रस्त्याची दुरुस्ती करून घेवपाचो आपूण यत्न करतलों, अशें तांणी सांगलें.
मजगतीं, पावस सोंपले उपरांत थळाव्या लोकांनी फुडाकार घेवन रस्तो दुरुस्तीचें काम हातांत घेतलें. ह्या वेळार सरपंच उदयसिंह राणे हाजीर आशिल्ले. थळाव्या लोकांनी लोबरां दाळून ताचेर माती घालून तात्पुरतो रस्तो दुरुस्त केला. ह्या वावरांत थळावे पंच बाबूराव गावडे आनी हेर तरणाट्यांनी तशेंच थळाव्या लोकांनी योगदान दिलें.
नाणूस वाठारांतलो रस्तो पुराय उदका पोंदा गेल्लो. हें उदक कुशीच्या घरांनी वचून कांय प्रमाणांत लुकसाण जालें. ह्या रस्त्याचेर उदक सांचिल्ल्यान सुमार दोन वरां येरादारी बंद जाल्ली.
मजगतीं, सत्तरी म्हालाच्या खूबशा वाठारांनी रोजांची लागवड केल्या. निकतीच तांकां फुलां फुलपाक सुरवात जाल्या. मात फाटल्या 15 दिसां सावन नेमान पडपी पावसाक लागून रोजां कुसपाची शक्यताय आसा. तशें जालें जाल्यार रोजां उत्पादकांक अर्थीक लुकसाण जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
