भांगरभूंय | प्रतिनिधी
पर्यें पंचायतींत दोगांक समान मतां: चीट घालून निकाल जाहीर
वाळपय: सत्तरी म्हालांतल्या 12 पंचायतींच्या वेंचणुकां खातीर काल मतां मेजणी जाली. हे मत मेजणे उपरांत जायत्या प्रस्थापीत लोकांक धपकोे बसलो. जायत्या आदल्या सरपंच आनी पंच वांगड्यांक मतदारांनी घरा धाडले, तशेंच खुबश्या नव्या उमेदवारांक मतदारांनी अंदूं संद दिल्या. मजगतीं, मेळिल्ले म्हायती प्रमाण वेंचून आयिल्ले सुमार 90 टक्के उमेदवार भलायकी मंत्री विश्वजीत राणेचे समर्थक आसात.
मतां मेजपाची प्रक्रिया वाळपयच्या कदंब बस स्टँडार जाली. पूण त्या जाग्यार बसपाची वेवस्था नाशिल्ल्यान समर्थकांक उबेच रावचे पडले. तेच प्रमाण पावसांत भिजून रावचें पडलें. ताका लागून वेंचणूक अधिकार्यांचे एकंदर वेवस्थे संबंदी समर्थकांनी खर तिडक उक्तायली. ह्या जाग्यार मंडप उबारप गरजेचें आशिल्लें. पूण ताचे कडेन आड नदर जाल्ल्यान समर्थकांक पुराय दीस उबे रावचें पडलें आनी बरेच त्रास सोंसचे पडले.
हे संबंदी चड म्हायती प्रमाण सत्तरी म्हालांतल्या बारा ग्रामपंचायतींची वेंचणूक 10 ऑगस्टाक जाल्ली. शुक्रारा मत मेजणी जाली. सकाळीं आठ वरांचेर मत मेजणी सुरू जाल्ली. पयलीं भिरोंडा पंचायतीचो निकाल जाहीर जालो. ते उपरांत हेर पंचायतींचो निकाल टप्प्या टप्प्यान जाहीर जालो. सगल्या पंचायतींच्या मतांची मेजणी सांजच्या 6 मेरेन पुराय जाली.
मजगतीं, पत्रकारांची वेवस्था जावंक नाशिल्ल्यान समर्थकांक आनी हेरांक म्हायती दिवपाक जायत्यो आडखळी निर्माण जाल्यो. ताका लागून नागरिकांनी खर तिडक उक्तायली.
पर्यें पंचायतींत चीट घालून निकाल
मजगतीं, सत्तरी म्हलांतली पर्यें पंचायत प्रभाग क्रमांक 9 त रती गांवकार आनी महेश गांवकार हांकां 132 समान मतां मेळ्ळीं. ताका लागून परत एक फावट मत मेजणी जाली. हे मेजणींतूय मतां सारकीं जाल्ल्यान चीट घालून निकाल जाहीर केलो. लॉटरी उपरांत रती गांवकार हिका जैतवंत जाहीर केली. ताका लागून सुमार तीन वरां समर्थकूय बरेच उबगले.
केरी पंचायतींत श्रीपाद गांवसाक एका मतान येस
मजगतीं, केरी पंचायत वाठारांतल्या प्रभाग क्रमांक 3 त श्रीपाद गांवस हाका एका मतान जैत फावो जालें. मतां मेजपाची कार्यावळ घेतल्या उपरांत एक मतान जैत मेळिल्ल्याचें स्पश्ट जालें. पूण परत एक फावट मतां मेजलीं. हे मत मेजणी उपरांतूय श्रीपाद गांवस एक मतान जिखले हें सिद्ध जावन ताका जैतवंत जाहीर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
