भांगरभूंय | प्रतिनिधी
विश्वजीत राणेः रान खात्याक पत्र धाडून केली मागणी
भांगरभूंय । प्रतिनिधी
वाळपयः सत्तरी म्हालांतल्या करंझोळ, कुमठोळ, बंदीरवाडो ह्या वाठारांतल्या सुमार 50 जाणां आड गुन्यांव दाखल केल्यात. फाटल्या एका वर्सां सावन हे गुन्यांव फाटीं घेवचे, अशी थळावे लोक नेमान मागणी करतात. आतां थळावे आमदार तशेंच भलायकी मंत्री विश्वजीत राणे हांणी हे संबंदांत रान खात्याक पत्र धाडून तांचे वयले गुन्यांव फाटीं घेवपाची मागणी केल्या. ह्या पत्राची ताकतिकेन दखल घेवची, अशी विनवणी तांणी हे संबंदांत धाडिल्ल्या ई मेली वरवीं केल्या.
पोरूं सत्तरी म्हालांतल्या करंझोळ, कुमठोळ, वाठारांत म्हादय अभयारण्याचे परिक्षेत्र अधिकारी नारायण प्रभुदेसाय, कर्मचारी आनी थळाव्यां मदीं व्हड प्रमाणांत संघर्श जाल्लो. ह्या वेळार नारायण प्रभुदेसाय हांणी स्वताच्या बचावा कातीर हवेंत फारपेट केल्ल्यान तणावाची स्थिती निर्माण जाल्ली. ताका लागून थळाव्यांनी खात्याच्या कर्मचाऱ्यांक सुमार पांच वरां आडावन दवरिल्ले. पुलिसांनी मध्यस्थी करून तांची सुटका केल्ली. ते उपरांत रान खात्यान हे संबंदांत पुलीस कागाळ केले उपरांत करंझोळ, कुमठोळ, बंदीरवाडो ह्या वाठारांतल्या सुमार 50 परस अदीक जाणांक हे संबंदांत नोटिसो जारी करून तांचेर गुन्यांव दाखल केल्ले.
हे संबंदांतली फाटभूंय म्हणल्यार 1999 त राष्ट्रपती राजवट आसतना राज्यपाल जे. आर. जेकब हांणी म्हादय अभयारण्याची अधिसुचोवणी जारी केली. तातूंत 32 गांवांचो आस्पाव केल्लो. तेन्ना सावन आयज मेरेन अभयारण्य वाठारांत आस्पाव केल्ल्यो लागवडीच्यो जमनी, लोकवसती, देवळां, देवस्थानां वगळावचीं अशी मागणी परतून परतून थळावे लोक करतात. फाटल्या 10 वर्सां सावन अभयारण्याचे अधिकारी, कर्मचारी आनी थळावे लोक हांचे मदीं एकसारको संघर्श जायत आसता.
मजगतीं, ह्या प्रकरणाचेर पड्डो घालून दोगांय मदीं समन्वय घडोवन हाडपाचे नदरेंतल्यान पुलिसांनी मध्यस्थी केल्ली. तातूंत नारायण प्रभुदेसाय फाटी सरिल्ले. ताका लागून कोणाचेरूच गुन्यांव दाखल जावचो ना, अशें आस्वासन पुलिसांनी दिल्लें. मात निमाण्या खिणाक पुलिसांनी विस्वासघात केलो आनी सुमार 200 परस अदीक जाणांचेर वाळपयच्या प्रथमवर्ग न्याय दंडाधिकारी कार्यालयांत आरोपपत्र दाखल केलें. हे संबंदांतल्यो नोटिसो थळाव्यांक आयले उपरांत परतून एकदां तणावाची स्थिती निर्माण जाली आनी अभयारण्याच्या कर्मचाऱ्यां आड खर तिडक उक्तायली. मदल्या काळांत भलायकी मंत्री विश्वजीत राणे हांचे कडेन संपर्क करून ते गुन्यांव फाटीं घेवपा संबंदांतली मागणी केल्ली. ह्या संबंदांत आपूण लक्ष घालतां, अशें आस्वासन भलायकी मंत्र्यान दिल्लें. ते प्रमाण 27 ऑगस्टाक ई मेलाचेर पत्र धाडून थळाव्या लोकांचेर दाखल केल्ले गुन्यांव सरकारान ताकतिकेन फाटीं घेवचे, अशी मागणी केल्या.
मागणेची ताकतिकेन अंमलबजावणी जावचीः राणे
थळावे लोक आनी अभयारण्याच्या कर्मचाऱ्यां मदीं कांय गैरसमज जाल्ले आनी ताका लागून तणाव निर्माण जाल्लो. त्या वेळार थळाव्या लोकांचेर गुन्यांव दाखल केल्ले. ते गुन्यांव फाटीं घेवचे, अशी मागणी आपणे केल्या. तशेंच ताची ताकतिकेन अंमलबजावणी जावची अशी विनवणी केल्या. थळावे लोक आनी रान खात्याच्या कर्मचाऱ्यां मदीं समन्वय जावप खूब गरजेचें आसा. ना जाल्यार फुडारांतूय तणावाची स्थिती उप्रासूं येता, अशें सत्तरी मतदारसंघाचे आमदार तशेंच भलायकी मंत्री विश्वजीत राणे हांणी प्रतिनिधी कडेन उलयतना सांगलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
