भांगरभूंय | प्रतिनिधी
घरांचें, वीज खात्याचें लुकसाण; साबार वाठारांनी पडलीं झाडां
भांगरभूंय । प्रतिनिधी
वाळपय : मंगळारा सांजे वेळार आनी मध्यान रातीर आयिल्ल्या वादळी वाऱ्यान सत्तरी म्हालांत धुमशेण कांडलें. खूबश्या वाठारांनी झाडां पडून घरांचें लुकसाण जालें. वीज सरयांचेर झाडां पडिल्ल्यान वीज सरयो तुटल्यो आनी खूबश्या वाठारांतली वीज पुरवण बंद पडली. बुधवारा सकाळ मेरेन खूबश्या गांवांतली वीज पुरवण सुरू जाल्ल्याची म्हायती मेळ्ळ्या.
वाळपय उजो पालोवपी दळाच्या जवानांनी मंगळारा मध्यानरात ते बुधवारा सकाळ मेरेन 16 वाठारांतल्यो आडखळी पयस केल्यो. कुडसेच्या अर्जून गांवकार हाच्या घराचेर झाड पडिल्ल्यान 50 हजारांचें लुकसाण जालें, जाल्यार दळाच्या जवानांनी एका लाखाची मालमत्ता वाटायली.
मेळिल्ले म्हायती प्रमाण मंगळारा मध्यानरातीर खूबश्या वाठारांनी वादळी वाऱ्याचो मार बसलो. खूबश्या गांवांनी पडझड जाली. वाळपय उजो पालोवपी दळाच्या जवानांनी दिल्ले म्हायती प्रमाण दाबोस वाठारांत रानवटी झाड पडिल्ल्यान गांवांतलो रस्तो येरादारी खातीर बंद जाल्लो. खोतोडे पंचायत वाठारांतल्या बाराजण वाठारांत आंब्याचें झाड वीज सरयांचेर पडिल्ल्यान सरयो तुटल्यो. ताका लागून गांवांतली वीज पुरवण बंद पडली. वाळपय पुलीस प्रशिक्षण केंद्राच्या कॅण्टीन इमारतीचेर झाड पडिल्ल्यान इमारतीचें सुमार 50 हजारांचें लुकसाण जालें. वाळपय – कुमठोळ गांवांत वचपी रस्त्याचेर रानवटी झाड पडिल्ल्यान रस्तो येरादारी खातीर बंद जाल्लो. तशेंच गांवाक वीज पुरवण करपी सरयांचेर झाड पडून त्यो तुटल्यो. ताका लागून वीज पुरवण बंद जाली.
गांवकारवाडो पाडेली वाठारांत वीज सरयांचेर आंब्याचें झाड पडून सरयो तुटल्यो. भिरोंडें – पिसुर्ले रस्त्याचेर रानवटीं झाड् पडिल्ल्यान रस्तो येरादारी खातीर बंद जाल्लो. कुडासे वाठारांत अर्जून गांवकार हाच्या घराचेर झाड पडिल्ल्यान पाख्याचें सुमार 50 हजारांचें लुकसाण जालें. गुळेली सत्तरीचे दत्तू नायक हांच्या घराचे सगळे पत्रे वादळी वाऱ्याक लागून हुबून गेले. ताका सुमार लाखभराचें लुकसाण जालां. सध्या तरी खंयचोच रस्तो बंद ना. सगळ्यो आडखळी काडल्यात, अशी म्हायती उजो पालोवपी दळाच्या सुत्रांनी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
