भांगरभूंय | प्रतिनिधी
वाळपय: राज्यपाल श्रीधरन पिल्ले सत्तरी म्हालांतल्या सगल्या सरपंच आनी पंचायत वांगड्यां कडेन संवाद सादपाचे आसात. ही खाशेली कार्यावळ मंगळारा 6 सप्टेंबराक सकाळीं 11 वरांचेर जातली. सरपंच राज्यपालांक उदरगतीच्या कामां विशीं म्हायती दितले. राष्ट्रपिता महात्मा गांधीजीन ‘चल या गांवांत’ असो संदेश दिल्लो. ‘पयलीं गांवांची वळख करून घेवची आनी मागीर उदरगतीची येवजण हाडची’ असो संदेश ते दिताले. राज्यपाला पिल्ले हांणी गांधीजींचो हो संदेश चालीक लावपाचो निर्णय घेतला. पोरूं नगरगांवां जाल्ले कार्यावळींत राज्यपालांनी चार सरपंचां कडेन संवाद सादिल्लो. हातूंतल्यो कांय पंचायती उरल्यात. थळावे आमदार तशेंच भलायकी मंत्री विश्वजीत राणे हांच्या कार्यालयांत ही कार्यावळ जातली. 12 सरपंच आपल्या वाठारांतलीं उदरगतीचीं कामां, इतिहासीक थळां, शिक्षणीक परिस्थिती हे विशीं संवाद सादतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
