सत्तरींतल्या घसघशांचेर मेळटल्यो सुविधा

भांगरभूंय | प्रतिनिधी

रान मंत्र्याचे सोपस्कर पुराय करपाचे खात्याक निर्देश

भांगरभूंय । प्रतिनिधी

वाळपयः सत्तरी म्हालांतल्या पावसाळी घसघशांचेर व्हड प्रमाणांत पर्यटकांची गर्दी जाता, पूण थंय साबार गैरसोयी आसात. हाचेर रान खात्यान विशेश लक्ष दिलां. फुडारांत ह्या घसघशांचेर साबार तरांच्यो सुविधा निर्माण करतले. रान मंत्र्यान ह्या संबंदांत खात्याक निर्देश दिल्यात आनी ह्या थळांचेर विवीध सुविधा दिवपाचे नदरेन कागदपत्री सोपस्कार पुराय करचे अशें म्हणलां.

सत्तरी म्हालांत पावसाळ्यांत व्हड प्रमाणांत घसघशे दोंगरा वयल्यान कोसळटात. सैमाचो सुंदर आविश्कार अणभवपाक आनी पळोवपाक ह्या मोसमांत व्हड संख्येन पर्यटक ह्या घसघशांचे सुवातेचेर येतात. मात हालींच्या काळांत ह्या घसघशांचेर व्हड प्रमाणांत दुर्घटणा घडपाक लागल्यात. एका म्हयन्या आदीं साट्रेच्या एका घसघशांचेर दोन तरणाट्यांक बुडून मरण आयिल्लें. हाका लागून सुरक्षा आनी सुविधां संबंदांत प्रस्न निर्माण जाल्लो.

हाची गंभीर दखल घेवन रान खात्यान एक विशेश मोहीम आंखल्या. हे मोहिमे खाला घसघशांचो विकास करतले. घसघशाचे सुवातेचेर जीव रक्षकांची नेमणूक करतले. सत्तरी म्हालांत धा परस अदीक घसघशे आसात. दरेका घसघशाचेर दोन जीवरक्षक नेमतले, अशी म्हायती मेळ्ळ्या. तशेंच ज्या घसघशांचेर पर्यटक मस्ती करतात, तांकां आळाबंदा हाडचे खातीर ही विशेश मोहीम आंखल्या, अशीय म्हायती मेळ्ळ्या.

घसघशाचेर येवपी पर्यटकांक शौचालयाची व्हड समस्या सतायता. हाका लागून पर्यटक उक्ताडाचेर सैमीक विधी करतात. हाका लागून पर्यावरणाचेर ताचो वायट परिणाम जाता. हाची विशेश दखल घेवन दरेका घसघशाचेर बायोटॉयलेटाची वेवस्था करतले. तशेंच पर्यटकांक चड करून बायलांक कपडे बदलपाची वेवस्था करतले, अशी म्हायती मेळ्ळ्या. रान खात्या वतीन ही वेवस्था करतले. मात येवपी दरेका पर्यटका कडल्यान दरेकी 100 रुपया शुल्क घेतले. ताका पर्यटकांनी आदार करचो, असो उलो खात्यान मारला. ह्या कामां खातीर अभयारण्याचे उपवनपालाक नोडल अधिकारी म्हूण नेमला. हे संबंदांतली अमलबजावणी टप्प्याटप्प्यान जातली, अशें मेळिल्लें म्हायती वयल्यान कळ्ळां.

पर्यटनाक चालना दिवपाक हालचालीः दिव्या राणे

सत्तरींतल्या घसघशांचेर सुविधा मेळोवन दिवपा खातीर रान मंत्री विश्वजीत राणे हांणी निर्देश जारी केल्यात. हे संबंदांत रान खात्यान कार्यवाही सुरू केल्या. सत्तरी म्हालांतल्या घसघशांच्या माध्यमांतल्यान पर्यटकांक चालना दिवपा खातीर हालचाली सुरू केल्यात. ह्या वावराक लोकांनी तशेंच पर्यटकांनी आदार करचो, असो उलो रान विकास म्हामंडळाची अध्यक्ष दिव्या राणे हांणी संपर्क केलो तेन्ना सांगलें.