भांगरभूंय | प्रतिनिधी
पटेरी वागाक लागून रान खात्याचो निर्णय
भांगरभूंय । प्रतिनिधी
वाळपय: सुर्ला सत्तरी वाठारांत पटेरी वागाचो वावर आशिल्ल्यान सडा ह्या वाठारांत आशिल्ल्या सैम पर्यटन थळाचेर वचपाक पर्यटकांक बंदी घातल्या. ताका लागून पर्यटकांची लांकडाचो ओझर घसघसो पळोवपाची संद गेल्या.
गोंयचें माथेरान म्हूण फामाद आशिल्ल्या सत्तरी म्हालांतल्या सुर्ला वाठारांत पंदरा दिसां आदीं एका पटेरी वागान थळाव्या देऊ पिंगळे हांच्या दोन पाडकांक खाल्ली. ताका लागून ह्या वाठारांत भिरांतीचें वातावरण पाताळिल्लें. ह्या वाठारांत पट्याचो वाग भोंवता अशी म्हायती मेळ्ळ्या. ह्या वाठारांत पर्यटकांक वचपाक म्हादय अभयारण्याच्या वेवस्थापनान बंदी घातल्या.
सडा वाठार सैमीक नदरेन खुबूच सोबीत आसा तशेंच थंयचें वातावरण थंड आसता. हाका लागून गोंय, कर्नाटक, महाराष्ट्र आनी हेर वाठारांतल्यान व्हड प्रमाणांत पर्यटक पावसाळ्यांत येतात. चड करून शेनवारा आनी आयतारा ह्या वाठारांत पर्यटकांची खुबूच गर्दी जाता.
सादुरकायेचो उपाय म्हूण बंदीः तांडेल
पंदरा दिसां आदीं पटेरी वागान हल्लो करून दोन पाडकांक खाल्यात. सडा वाठारांत दाट रान आसा. ह्या रानांत वाग आसूं येता. हे फाटभुंयेर सादुरकायेचो उपाय म्हूण ह्या वाठारांत येवपाक पर्यटकांक बंदी घातल्या, अशी म्हायती रान विभागाचे अधिकारी दीपक तांडेल हांणी दिली.
रान खात्याची नाकाबंदी
फाटल्या शेनवारा आनी आयतारा व्हड प्रमाणांत पर्यटक ते सुवातेचेर वचपा खातीर आयिल्ले. मात रान खात्यान थंय नाकाबंदी केल्ल्यान तांकां परतून वच्चें पडले, अशी म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
