सडा मार्केट बेगीन सुरू करपाक मुरगांव आमदाराची धडपड

मार्केट संकुलाची पळोवणी करतना आमदार संकल्प आमोणकार. वांगडा श्रद्धा आमोणकार आनी हेर. (अक्षंदा राणे)

भांगरभूंय | प्रतिनिधी

अधिकाऱ्यां वांगडा केली पळोवणी

भांगरभूंय । प्रतिनिधी

वास्कोः हेडलॅण्ड सडा मार्केट संकूल बेगीन चालीक लागचो हे खातीर मुरगांवचे आमदार संकल्प आमोणकार हांणी नेट धरला. तांणी ह्या मार्केट संकुलाक भेट दिवन पळोवणी केली. हें मार्केट संकूल सुरू करपा संबंदांत तांणी संबंदीत अधिकार्यां कडेन चर्चा करून कांय निर्देश दिले. ह्या वेळार तांच्या वांगडा नगरसेविका श्रद्धा आमोणकार, मुरगांव पालिकेचे मुख्याधिकारी सिद्धीविनायक नायक, तशेंच हेर अधिकारी आशिल्ले. हो मार्केट प्रकल्प उबारचे खातीर आदले मंत्री आनी मुरगांवचे आमदार मिलिंद नायक हांणी फुडाकार घेतिल्लो. मार्केटाच्या पयल्या माळ्याचेर फळभाजी, नुस्तें मार्केट तशेंच झेल सांठोवन दवरपाच्यो कुडी आसात. दुसऱ्या माळ्याचेर 23 दुकानां आसात, जाल्यार तिसऱ्या माळ्याचेर सुपर मार्केटाची वेवस्था केल्या. चवथ्या माळ्याचेर सुमार 500 कदेलांचो कम्युनिटी हॉल आसा. तळमाळ्याचेर गाडयो पार्कींगची वेवस्था आसा. हो प्रकल्प पुराय जाले उपरांत ताचें 31 मे 2021 त तेन्नाचे नगराध्यक्ष दामोदर कासकार हांचे हस्सतुकीं लोकार्पण केल्लें. पूण हो प्रकल्प अजून सुरू जावंक ना. वीज आनी उदक बिलांची व्हड थकबाकी आशिल्ल्यान संबंदीत खात्यान वीज, उदका पुरवण करपाक न्हयकार दिल्लो. आतां ती रक्कम वन टायम सेटलमेंटा खाला फारीक केल्ल्याचें कळ्ळां. ताका लागून व्हड आडखळ पयस जाल्या. हो प्रकल्प सुरू जालो जाल्यार लोकांक, विक्रेत्यांक बरी सुविधा मेळटलीच, तशेंच पालिकेचे महसूल वाडीक मजत जातली.