भांगरभूंय | प्रतिनिधी
वास्को: सडा कोयर प्रक्रिया प्रकल्पांतल्या कोयराचे राशीक लागिल्लो उजो पालोवपा खातीर व्हड प्रमाणांत वापरिल्ली माती मुरगांव पालिका कशी काडटली हाचे कडेन लोकांचे लक्ष लागलां. ही माती काडपा खातीर मुरगांव पालिकेक कितलो खर्च सोंसचो पडटलो हे विशींची आरती परती चर्चा सुरू आसा. हो उजो कोणे तरी लायला असो दुबाव उक्तायतात. पूण दुबावीत अजून लेगीत सांपडिल्लो ना.
कोयर प्रक्रिया प्रकल्पांतल्या कोयराक 4 जानेवारीक रातीं उजो लागिल्लो. हो उजो लागिल्ल्याचें उसरां लक्षांत आयलें. तो मेरेन उजो सगली कडेन पातळिल्लो. तशेंच भितर वचपाचे वाटेरूच उजो लागिल्ल्यान उजो पालोवपी दळाच्या जवानां मुखार उजो पालोवपा खातीर मोटो प्रस्न उबो राविल्लो. पूण तांणी खर यत्न करून उज्याचेर नियंत्रण मेळयिल्लें.
उदकाचो मारो केले उपरांत उजो तात्पुरतो पालवतालो, पूण उपरांत परतून पेट घेतालो. हाका लागून उजो पालोवपा खातीर मायतेचो वापर करपाचो निर्णय घेतलो. ते प्रमाण उजो पालोवपा खातीर व्हड प्रमाणांत माती त्या कोयराचे राशीचेर रकयली. सुमार धा दिसा उपरांत उजो आटापा आयलो.
आतां ते सुवातेर कोयरा सयत व्हड प्रमाणांत मातयेचो भराव पडला. कोयर कुशीक काडपा बरोबर माती काडपाचें कामूय मुरगांव पालिकेक करचें पडटलें. मातयेन भरसल्लो कोयर दुसरी कडेन उडयतले काय तातूंतली माती वेगळी करून कोयराचो विलो लायतले हे संबंदी लोकां मदीं आरती परती चर्चा सुरू आसा.
कोयराक उजो लागलो काय कोणे तरी लायली हे विशींची बरीच गरमागरम चर्चा जाल्ली. खूबशा जाणांनी उजो लायिल्ल्याचो दुबाव उक्तायिल्लो. हे संबंदी मुरगांव पुलीस स्टेशनार लेखी कागाळ करपाचें थारिल्लें. ती कागाळ केल्या काय ना हे विशींची चर्चा सुरू आसा. कोयर वयर सकयल करपा खातीर जेसीबीचो वापर केल्लो. ताका लागून उजो पालोवपा खातीर कितलो खर्च केलो हे जाहीर करपाची गरज कांय जाणांनी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
