भांगरभूंय | प्रतिनिधी
वाचन हो एक व्हडलो छंद. ‘वाचल्यार वाचतलें’ अशें म्हणटात, तें खरें. वाचन तुमकां येता त्या भाशांनी करूं येता. आवयभाशेंतल्यान वाचप समजूंक सोंपें जाता. वाचनाक लागून मनीस बुद्धीमान जाता आनी ताका पुस्तका सारको नवो इश्ट मेळटा. ताचें व्यक्तीमत्व सुदारता. ताका ज्ञान मेळटा. वाचन ही एक अशी कला, जी मनशाक मनीस करता, जिणेक नवी दिका दिता, विचार करपाक शिकयता, अंतर्मुख करता, कितें बरें आनी वायट हाची जाणविकाय दिता. संस्कृतांतल्या ‘वाच’ ह्या उतरा पसून वाचन हें उतर तयार जालां. ‘वच’ म्हळ्यार उलोवप आनी ‘वाच’ म्हळ्यार उलोवंक लावप. वाचन आसल्यारूच उतरांत बळगें येवं येता हें खरें.
वाचपाचें म्हत्व
समजून घेवन ध्वनी उच्चार करप म्हणल्यार वाचन. वाचनांतल्यान व्यक्तीमत्वाची भितरली उदरगत जाता. उलोवपांत सुदारणा जाता. वाचन क्षमतेचो पुराय विकास तातूंतल्यान भायर सरपी अर्थ निश्पत्तीचेर आदारून आसता.देखून अर्थ समजून घेवन वाचपाक जाय. शास्त्रां आनी हेर पुस्तकां वाचून गिन्यान मेळटा. सुखा खातीर बरें साहित्य वाचचें. वाचनांतल्यान मनशाच्या मनाचेर बरे संस्कार जातात.
कथा, कविता, कादंबरी, नाटकां, ह्या रसग्रहण दृश्टी मेळटा, वाचून मनांत सुखाची भावना भरता.
वाचना पयलींची तयारी आनी प्रकार
कुडींतलीं वाचन कुशळटायेचीं इंद्रियां परिपक्व जावंक जाय. स्वासाचेर नियंत्रण दवरपाक जाय. व्यक्ती, वस्तू, थळां, घडणुकांचो संबंद समजून घेवपाची तांक आसपाक जाय. मेंदू संदेश घेवपाक तयार आसूंक जाय. चड आवाज आशिल्ल्या अक्षरध्वनींचो उच्चार केल्यार ताका उक्तें वाचन अशें म्हण्टात. विद्यार्थ्यान स्वता खातीर केल्लें वाचन म्हणल्यार सस्वर वाचन. शिक्षकान विद्यार्थ्या खातीर केल्ल्या वाचनाक सुस्वार वाचन म्हण्टात. दोळे आनी मेंदवान अर्थ समजून घेवप हाका मूकवाचन म्हणटात. खोल वाचन : मजकूर वाचप. विस्तार वाचन : कविता, नाटकां, नेमाळीं वाचप. वेग वाचन : योग्य गतीन वाचप हाका गती वाचन म्हण्टात.
वाचन कशें करचें
उजव्यान उजवाड येवंक जाय. नदर आनी पुस्तक 40 अंश कोनान आसपाक जाय. पुस्तक आनी दोळ्यां मदीं 9 ते 12 इंच अंतर दवरप, न्हिदून वाचप धोक्याचे. पुस्तक वाचतना पुराय उगडप, हेर कामां करतना पुस्तकां वाचूं नाकात. पुस्तकाचेर चिन्नां घालचीं न्हय. पुस्तकांत एक कव्हर घालप. वाचिल्ल्या पुस्तकांतले मुद्दे नोंद करात. दुसऱ्याचें वा वाचनालयाचें पुस्तक वेळार दिवचें. वाचिल्लें पुस्तक आलमारींत बंद करून दवरचें. पुस्तकाचेर स्वताचें मत तयार करचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
