भांगरभूंय | प्रतिनिधी
गीतकार माधव ज्युलियन हांचे ‘कशासाठी पोटासाठी’ हे फामाद गीत. सगळें कितें तें पोटा खातीर करचें पडटा. सकाळीं बेगीन
उठपाक जाय, ह्या हुसक्यान रातची न्हीद पडना. उठपाचें आनी कामांक धावपाचें. भुरग्यां- बाळांक पळोवपाक वेळूच नासता. वेळार कामार पावूंक जाय. नाजाल्यार सायबाची तापोवणी. अर्दो दिसूय कातरतात. कांय जाण भाग्यवान. सरकारी बाबू उसरां कचेरींत आयलो म्हणून ताका कोण विचारीना. सांजचो हक्कान तो बेगीन घरा वता. दनपारचो जेवपाक जाय तितलो वेळ घेता. कारण ताचो ‘गॉडफादर’ आसता. तो दिसाची कितलीं वरां आनी कितें काम करता तें गॉडफादराकूच खबर. इतलेंय करून घसघशीत पगार घेता. आडेची जोड तर नक्कीच आसता. त्या भायर आनीक कितले तरी धंदे करता. कोणाक नोकरी दिता म्हणून पयशे घेता, इन्शुरन्स एजन्सी घेता, रेवेंक ट्रक लायता…. हजार धंदे.
कलियुगांत घडये असो आड जोडिल्लो पयसो पचता, अशें समजूं नाकात. उजू मार्गान जोडिल्लो पयसोच पचना तो आड मार्गान मेळयिल्लो कसो पचतलो? बँको, इंन्शूरन्स आनी आतां आयटी कंपनी आसात म्हणून कोणाचे पाय धरी नासताना, कोणाक पयशे दी नासताना आमचे तुमचे सारके कामाक लागले. वेळार कामाक पावूंक जाय. एक तर बस ना जाल्यार स्कुटर, मोटरसायकल वा धाकटे गाडयेन सकाळीं कामाक गेल्लो सांजचो घरा धडधाकट पावतलो अशें ना. तांच्या आवय- बापायक सदांच हुस्को. गोंयांत आयल्ले दिसा अपघात. वर्साक सादारण तिनशें लोक मरतात. रस्ते हे अपघातांचें एक मुखेल कारण. बरे फोंड नाशिल्ले रस्ते आमच्या नशिबांत ना काय कितें?
शीता वयरसून भाताची परिक्षा अशें म्हणटात. आमच्या गांवांसून वचपी हायवेर आशिल्ले फोंड पळोवन गोंय भर रस्त्याचेर कितले फोंड आसात आनी ताचो लोकांक कितलो त्रास जाता, हाचो अदमास काडूं येता. मदीं रस्त्यार एकूय फोंड दिसचोना अशी ‘राणा भीमादेवी’ थाटाची गर्जना केल्ली ती खंय विरून गेली काय? फोंड पळोवपाक अॅप तयार करपाचे आसले, ताचें कितें जालें? माशेल ते आमोणा- खांडोळे पूल रस्त्यार मात्शी चडटी आसली. कोणांक ताचो त्रास जायनासलो. कोणाचे तरी फिन तकलेन हांगा एक संद आसा ती वळखली. चडटी कमी करपाक रस्त्याचो शंभर मीटर कुडको पावसाच्या तोंडार खणून पोंदा घालो. ताचेर शेण सारयिल्ले सारकें डांबर घालें. 15- 20 दिसांनी कितले तरी फोंड पडले. म्हजो इश्ट आनी पर्यावरण मोगी विराज बाक्रे हाणें गोंय सरकाराचो मुखेल सचिव त्याच प्रमाण भौशिक बांदकाम खात्याच्या मुखेल इंजिनियराक ईमेल धाडलो. ताचो परिणाम म्हणून दुसरेच दीस देवळाय जंक्शना कडले कांय फोंड पुरयले. एक मराठी पत्रकार ताचें श्रेय थळाव्या आमदार आनी मंत्र्याक दिवन मोकळो जालो. मुखेल रस्त्याचे काम मात थंयच उरलें. सगळ्यांत महत्वाची गजाल म्हळ्यार ह्याच रस्त्या वयरसून आमचे मानेस्त मुख्यमंत्री येतात वतात. नवप्रभात म्हजें ‘रस्त्यावरील खड्ड्यांकडे दुर्लक्ष का?’ हे पत्र छापून आयले. भांगरभूंयंत ‘रस्त्या वयले फोंड अत्र तत्र सर्वत्र’ हो लेख 23 सप्टेंबराक प्रसिद्ध जालो. खात्याक जाग हाडची हे येवजून सिनियर स्टार्स हे संस्थे मार्फत आमी जेश्ठ नागरिकांनी ह्या रस्त्यार श्रमदान करपाचें थारायलें. हांव, म्हजे इश्टट कृष्णानंद गांवकार आनी गणेश खांडोळकार हांणी भोवून लागच्या लोकांक श्रमदानांत वांटेकार जावपाची विनवणी केली. पंच सौ. श्रद्धा फडते हांणी सगळो पालव दिवपाचें उतर दिलें. दुसरो पंच मनोज नायक गांवकार हांणी दोन मानाय आनी पिकास, खोरें दिवपाचें उतर दिलें. साल्वोदार डायस, मोहन आजगांवकार, राजू गांवकार, किशोर गांवकार आनी राजू शेटकार हांणी उमेदीन वांटो घेवपाचें मान्य केलें.
श्रमदानाच्या आदल्या दिसा बेतकी- खांडोळेचे सरपंच भोवमानेस्त विशांत नायक हांणी आमकां श्रमदान करू नाकात अशी विनवणी केली. आपूण बांदकाम खात्याक सांगून बेगीन रस्तो करून घेतलो वा पंचायतीच्या खर्चान फोंड तरी पुरयतलो अशें उतर आमकां दिलें. तांच्या उतराक मान म्हणून आमी श्रमदान फुडें धुकल्लें. आवा शिवा करून पांच म्हयन्यांनी बांदकाम खात्याक जाग आयली. त्या रस्त्याचे भाग्य सद्यां तरी उजळलां. सरपंच, दोनूय पंच आनी जांणी आमकां श्रमदान करपाक पालव दिवपाचें उतर दिलें, तांकां धन्यवाद.
भौशिक बांदकाम खात्याक कांय प्रश्न. ह्या रस्त्याच्या कॉन्ट्रक्टराचें नांव, गांव, नामो, ताचो नोंदणी नंबर कितलो? टेंडर कितल्या खर्चाचें? ह्या रस्त्याक कितें गॅरंटी, वाॅरटी आसा? हो रस्तो कितलो तेंप फोंड मुक्त आसतलो? पावसा मेरेन तरी तो तग धरतलो? पावसांत फोंड पडल्यार पावसाक दोश दिवं येता. ताचे पयली फोंड पडल्यार कोणाक जापसालदार धरपाचें? ह्या कामांत भ्रश्टाचार जावंकूच ना, अशें तुमी सांगू शकतात? ह्या साबार प्रस्नांच्यो जापो तुमी जनतेक दिवच्यो. ना जाल्यार तुमी केल्ल्या कामाची तुमकांच ग्यारंटी ना, अशें आमी म्हणू येता. पावसा पयलीं ह्या रस्त्यार फोंड पडटले हें शेंबडे भुरगे सुद्धां सांगतले.
मदीं “मी परत येईन, मी परत येईन” हें वाक्य सोशल मिडियाचेर खूब गाजिल्लें. लोकांनी ताची खूब फाकांडांय केल्लीं. फोंड मात चुकनासतना परत येतात. तांचो धर्मूच तो. ते तो पाळतात. तांका आमी दोश दिवं शकनात. भ्रश्टाचार तांच्या पथ्यार पडटा. भ्रश्टाचारानूच गोंयचे जनते खातीर जाग्या जाग्यार फोंड खणून दवरल्यात. तरां तरांचे फोंड. आमी तातूंतल्यान मुक्त जातले जाल्यार फक्त सरकाराक खेपून, गाळी घालून कांयच जांवपाचे ना. ते खातीर भ्रश्टाचारा आड झुजपाक आमी फुडें सरपाक जाय. म्हज्या कामां खातीर कोणाकूच पयसो दिवचो ना आनी घेवचोय ना अशें जण एकलो जेन्ना थारायतलो आनी त्या प्रमाण वागतलो, तेन्नाच आनी तेन्नाच गोंय वाटावतलें.
उमाकांत शेटये
8390745837
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
