भांगरभूंय | प्रतिनिधी
मुरगांव म्हालाचे भोंवडेंत सातूय पंचायतींच्या वांगड्यां कडेन संवाद
भांगरभूंय । प्रतिनिधी
मुरगांवः लोकशायेंत लोकप्रतिनिधी हे लोकांनी वेंचून दिल्ले आसतात आनी लोक हे सर्वोच्च आसतात. लोकांची सेवा करचे खातीर लोकांनी लोकप्रतिनिधींक वेंचून दिल्ले आसतात. संविधानांत लोक सर्वोच्च आसात. लोकांचे सेवेंत रावून तांकां ती दियात. असो सल्लो राज्यपाल पी. एस. श्रीधरन पिल्लई हांणी मुरगांव म्हालांतल्या सातूय पंचायतींत वेंचून आयिल्ल्या पंच वांगड्यांत सल्लो दिलो.
मुरगांव म्हालांतल्या सातूय पंचायतींचे सरपंच आनी पंच वांगड्यांची भेट घेवपा खातीर राज्यपाल पिल्लई 25 ऑगस्टाक एका दिसाचे मुरगांव भोंवडेर गेल्ले. ह्या वेळार तांणी चिखली पंचायत सभाघरांत तशेंच साकवाळच्या उपासनगरांतल्या कला भवनांत आयोजीत केल्ले सरपंच आनी पंच हांचे वांगडा संवाद कार्यावळींत वाटो घेतलो. ह्या वेळार ते उलयताले.
राज्यपाल पिल्लई हांणी मुरगांव म्हालाचे भोंवडेची सुरवात साकवाळच्या श्री शांतादुर्गा देवळांत वचून देवीचें दर्शन घेवन केली. ते उपरांत बोगमाळो वाठारांतले चर्चींत वचून आशिर्वाद घेतले. ते उपरांत पंचायतीक भेट दिवन चिखली पंचायतीक भेट दिली. थंय चिखली पंचायत सभाघरांत तांणी चिखलीच्या पंचा वांगडा संवाद सादलो.
ह्या वेळार माचयेर पंचायत मंत्री मॉवीन गुदिन्हो, जिल्हो पंचायत वांगडी अनिता थोरात, चिखलीची सरपंच कमला प्रसाद यादव, सरपंच संकल्प महाले तशेंच राज्यपालांचे स्वीस सचीव हाजीर आशिल्ले. ह्या माचये वयल्या मानेस्तांनी आपले विचार मांडले.
हे कार्यावळी उपरांत राज्यपाल पिल्लई हांणी गोवा शिपयार्डाक भेट दिली आनी थंयच्या शीपयार्डाची पळोवणी केली. तशेंच गोवा शिपयार्डाचे मुख्य वेवस्थापकी संचालका कडेन चर्चा केली. सांजेच्या सत्रांत राज्यपालांनी उपासनगर साकवाळच्या कलाभवन सभाघरांत साकवाळ, कुठ्ठाळी, केळशी कासावली, वेळसांव पंचायतींचे सरपंच आनी पंच वांगड्यां वांगडा संवाद सादलो. आपल्या लोकांची सेवा करतना गांवची सोबितकाय सांबाळपाचो तांणी सल्लो दिलो. आपूण लोकांचे नोकर. ताका लागून लोकांचे सेवेक प्राधान्य दिवचें, अशेंय तांणी सांगलें.
हे कार्यावळीक उपजिल्होधिकारी रविशंकर निपाणीकार, गटविकास अधिकारी प्रसिद्ध नायक तशेंच चिखली पंचायत सचीव अमृत सांखळकार हाजीर आशिल्ले. चिखले आयोजीत केल्ले कार्यावळींत 19 दुयेंतींक राज्यपाल निधींतल्यान उपचारा खातीर 25 हजारांचो चॅक दिलो. उपास नगरांतले कार्यावळींत माचयेर कुठ्ठाळीचे आमदार आंतोन वाझ आनी पांचूय पंचायतींचे सरपंच आनी पंच वांगडी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
