भांगरभूंय | प्रतिनिधी
पणजी: भलायकी सेवा संचालनालयान राष्ट्रीय वेक्टर जनित रोग नियंत्रण कार्यावळी खाला आयज पणजे मिनेझिस ब्रागांझा सभाघरांत राज्य पांवड्याचेर आयोजीत कार्यावळींत संवसारीक मलेरिया दीस मनयलो.
कार्यावळीक मुखेल सोयरे म्हणून इंडियन मेडिकल असोसिएशनाचे अध्यक्ष डॉ. दत्ताराम बी. देसाय हे हजर आशिल्ले. ह्या वेळार उलयतना डॉ. देसाय हांणी राज्यांत मलेरिया रोगाचेर नियंत्रण हाडपा खातीर भलायकी खात्याच्या कर्मचार्यां कडल्यान जावपी वावराची तोखणाय केली आनी मलेरिया रोगाच्या निर्मूलना खातीर सगळ्यांनी मेळून यत्न करपाची गरज उक्तायली. गोंय हें ल्हान तशेंच सुशिक्षीत लोकांचें राज्य आशिल्ल्यान लोकांमदी मलेरिया रोगाविशीं जागृताय करप आनी गरजेचे उपाय करून मलेरियाचे निर्मूलन करप शक्य आशिल्ल्याचें, तांणी सांगलें.
कार्यावळ अधिकारी आनी राष्ट्रीय वेक्टर जनित रोग नियंत्रण कार्यावळीचे उपसंचालक डॉ. कल्पना महात्मे हांणी येवकाराच्या उलोवपांत गोंय राज्यांत मलेरिया नियंत्रणा खातीर केल्ल्या उपायांचो नियाळ घेतलो. गोंयांत थळाव्या लोकांमदीं मलेरिया रोगाचो आंकडो शुन्य आसलो तरी स्थलांतरीत मजुरांक लागून गोंयांत मलेरियाचे दुयेंती सांपडटात. अशा लोकांचो सोद घेवन मलेरिया प्रतिबंदात्मक उपाय करपाचेर यंत्रणेचो भर आसता, अशें डॉ. महात्मे हांणी सांगलें.
राष्ट्रीय मलेरिया संशोधन संस्थेचे शास्त्रज्ञ अजीत कुमार मोहंती हांणी वेळार दखल घेवन आनी संशोधन करून मलेरियाचेर नियंत्रण हांडपाक राज्य सरकाराक मजत करप हे संस्थेचे प्राधान्य आशिल्ल्याचे सागलें आनी डिजिटल तंत्रज्ञान वापरून स्थलांतरीत मजूर आनी मलेरियाची पैदास जावपी जाग्यांचेर मलेरिया नियंत्रण उपाय करपाचेर संशोधन करतले, अशें सांगलें.
भलायकी सेवा संचालक डॉ. रूपा नायक हांणी राज्यांत मलेरियाचेर नियंत्रण दवरपाक खात्यावतीन गरजेचे उपाय करता अशें सांगलें. भलायकी मंत्र्यांची विशेश अधिकारी डॉ. राजनंदा देसाय आनी हेर भलायकी अधिकारी कार्यावळीक हजर आशिल्ले.
ह्या वेळार मानेस्तां हस्तुकीं मलेरिया निर्मूलनावयल्या पोस्टर सर्तीच्या जैतवंतांक इनामां भेटयलीं. तशेंच उत्कृश्ट सेवे खातीर भलायकी सेवा मळावयल्या कर्मचार्यांचो सत्कार केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
