संवसारीक टी-20 सर्तींचे दुसरे मॅचींत भारताचें वेस्ट इंडिजाचेर 6 विकेटींनी जैत दीप्ति शर्माच्यो 100 विकेटीः  रिचा घोषाची (44) नाबाद खेळी

भांगरभूंय | प्रतिनिधी

खबरां संस्था
केपटावनः जैता खातीर वेस्ट इंडिजान दिल्लें 119 धांवड्यांचें आव्हान भारताच्या पंगडान  18.1  ओव्हरींत हातासून वेस्ट इंडिजाक 6  विकेटींनी हारोवन संवसारीक टी-20 सर्तींतल्या आपल्या दुसऱ्या जैताची नोंद केली. कॅप्टन हरमनप्रीत कौर (33  ) आनी विकेटकीपर रिचा घोष (नाबाद 44 ) हांणी पंगडाक एकहाती अशें हे जैत मेळोवन दिलें आनी सर्तीतलें आपल्या आव्हानाक धार हाडली. ताचे पयलीं शेफाली वर्मा (28) आनी स्मृती मंधानान (10) भारताच्या डावाची बरी सुरवात केली. 3 बाद 43 उपरांत हरमनप्रीत आनी रिचा घोषान सूत्रां आपल्या हातांत घेवन पंगडाक जैताच्या दारांत हाडून दवोरलें. हरमनप्रीतान 42 बॉलांत 3 चौक्यांनी 33 जाल्यार रिचान 32 बॉलांत  5 चौक्यांनी नाबाद खेळी केली. जैताक चार धांवड्यो जाय आशिल्ल्यो तेन्नाच चिनेली हॅन्रीन हरमनप्रीताक कॅच आवट केलें. करिष्मा रामहरकान  14 धांवड्यांत 2 विकेटी  घेतल्यो.
 टॉस जिखून पयलीं बॅटिंग करून वेस्ट इंडिज पंगडान आपल्या 20  ओव्हरींत 6 विकेटी वोगडावन 118 धांवड्यो केल्यो. स्टेफिनी टेलर (42) आनी शोमायन कॅम्पबेल (30) हांणी डाव साल्वार केल्ल्यान तांकां धांवड्यांचो शेकडो हुबपाक मेळ्ळो. भारताची स्पीनर दीप्ति शर्मान तीन विकेटी घेवन टी-20 संवसारीक क्रिकेटीतल्या 100 विकेटी पुराय केल्यो. अशें करपी तें पयलें भारतीय बायल बॉलर थारलें. ताणे पूनम यादवाचो 98 विकेटींचो विक्रम मोडलो. आयचे मॅचींत एके ओव्हरींत दोन विकेट घेवंन ताणे नवो विक्रम केलो. टी-20 आंतरराष्टीय क्रिकेटींत सगल्यांत चड विकेटी घेवपाचो विक्रम वेस्ट इंडिजाच्या अनिसा मोहम्मद हिच्या नांवार आसा. ताणे 125 विकेटी घेतल्यात.
दुसरे ओव्हरीचे पयल्या बॉलार पूजा वस्त्रकारान हेली मॅथ्यूजाक (2) कॅच आवट केलें. पंगडाच्या 77 धांवड्यांचेर दीप्तिन कॅम्पबेलाक स्मृती मंधानाच्या हातांत कॅच दिवपाक लायली. ताणे 36 बॉलांत 3 चौक्यांनी 30 धांवड्यो केल्यो. 79 धांवड्यो जायसर एस टेलर आनी चिमेली हेन्री (2) आवट जाली. टेलरान दीप्तिक विकेट दिवचे पयलीं 40 बॉलांत6 चौक्यांनी 42 धांवड्यो केल्यो. ताणे टेलरा वांगडा दुसरे विकेटी खातीर 73 धांवड्याची भागिदारी केली.  हे उपरांत चेडन नेशन (नाबाद 21) आनी शबिका गजनबी (15) हांणी डावाक आकार दिलो. दीप्तीन 3 जाल्यार वस्त्रकार आनी रेणुका सिंगान देरकी एक विकेट घेतली.