संवसाररुपी मैदानाचेर विद्यार्थ्यांनी स्वताच्या नेमान खेळचेेंः रोहीत वाडकार

भांगरभूंय | प्रतिनिधी

भांगरभूंय । पत्रक
म्हापशेंः व्हो संवसार म्हणल्यार एक खेळाचें मैदान आसा. विद्यार्थ्यांनी स्वताच्या नेमांनी ताचेर खेळपाक जाय अशें इव्हेंट्स फॉर प्रुडंट मीडियाचो कार्यकारी संपादक रोहीत वाडकार हांणी सांगलें. ज्ञानप्रसारक मंडळाचें कॉलेज आनी संशोधन केंदांत पयल्या वर्साच्या विद्यार्थ्यां खातीर आयोजीत केल्ल्या ओरिएंटेशन कम इंडक्शन कार्यावळीचें उक्तावण केल्या उपरांत ते मुखेल सोरये म्हणून उलयताले. संवसारीकरणाच्या सद्याच्या तेंपार प्रादेशीक कल्पना लेगीत म्हत्वाच्यो थारपाक लागल्यात. ताका लागून सगळे कडेन संद तयार जातात. तांचो लाब घेवपा खातीर विद्यार्थ्यांनी तयार आसपाक जाय अशें तांणी सांगलें.
विद्यार्थ्यांनी अभ्यासा वांगडाच हेर गजालींत वांटो घेवपाक जाय, आपलो फुडार सुरक्षीत करपाक जाय. आपून ह्या कॉलेजांत शिकलां. प्राचार्य डी बी आरोलकार हांच्या फुडारपणा खाला कॉलेज प्रगतीचे तेंगशेर पावलां अशें तांणी नमून केले. सुरवेक प्राचार्य आरोलकार हांणी सगल्यांक येवकार दिलो. शिक्षणीक कारकिर्दीं वांगडाच डीएमसी शिक्षण संस्था विद्यार्थ्यांक तरेकवार संद उपलब्द करून दिता. फुडाराविशीं चड हुस्को करीत बसनाकात. शिकत रावात आनी जीण तुमची जनताय घेत रावतली अशें तांणी पयल्या वर्साच्या विद्यार्थ्यांक सांगलें.
दिवली पेटोवन उक्तावण सुरू जालें. कॉलेजाचे आदले विद्यार्थी वेदांग जोशी, प्राची कटारिया, साहिल मखंदर आनी स्टिफन आब्रुव हाणी कॉलेजांतले आपापले अणभव सांगले. कॉलेजांत पावल दवोरपी विद्यार्थ्यांनी आपले चारित्र्य आनी कारकिर्द बरे तरेन घडोवाचें असो उलो तांणी मारलो. रोहीत वाडकार हांच्या बीज भाशणा उपरांत वेगवेगळ्या विभागाच्या मुखेलीन तांच्या विभागाची विद्यार्थ्यांक माहिती दिली. उपप्राचार्य रशमी रेडकार हांणी उपकाराचें उलोवप करतकूच सत्राचो समारोप जालो. कार्यावळीचें सूत्रसंचालन सहाय्यक प्राचार्च योगिता कारखानीस हिणे सूत्रसंचालन करून मिनी प्रश्न मंजुषा सर्तचें संयोजन केलें. इंडक्शन कार्यावळ सुमार एक सप्तक चलतली