भांगरभूंय | प्रतिनिधी
पणजी: डॉ. केशव बळीराम हेडगेवार हायस्कुलाच्या पालक शिक्षक संघा वतीन, कला संस्कृती संचालनालयाच्या जोड पालवान आयोजीत केल्ल्या संपूर्ण वंदे मातरम् समुहगीत गायन सर्तींत कुडचडेंच्या सर्वोदय एज्युकेशन सोसायटी हायस्कुलान पयलें इनाम जोडलें. पोस्ट पेंटींग सर्तींतूय ह्याच हायस्कुलान पयलें इनाम जोडलें.
संपूर्ण वंदे मातरम् सर्तींतलें दुसरें इनाम कवळेंच्या लोकमान्य टिळक हायस्कुलाक जाल्यार तिसरें इनाम नेवरेंच्या आझमाने हायस्कुलाक फावो जालें.
उमेद वाडोवपी इनामां वळेरेन केरी सत्तरी विवेकानंद ज्ञान मंदीर, हरमल पंचक्रोशी हायस्कूल, मडगांवचे भाटीकार मॉडेल हायस्कूल, चिंबलाचे युनियन हायस्कूल आनी रायबंदराचे बालभरती विद्या मंदीर ह्या विद्यालयांक फावो जालीं. उत्कृश्ट रचनेचे इनाम कवळेंच्या लोकमान्य टिळक विद्यालयाक जाल्यार संगीत साथीचें (तबलो) आझमाने हायस्कुलाक फावो जालें.
तारानाथ होलेगद्दे आनी मनोज गणपुले हांणी परिक्षक म्हूण काम पळयलें. पोस्टर पेंटींग सर्तींत दुसरें इनाम वास्कोच्या भारतीय विद्या भवन नारायण बांदेकार हायस्कुलाक, तिसरें म्हापशेंच्या गणेश विद्या मंदिराक, चवथे कुडचडेंच्या गार्डियन एंजल हायस्कुलाक जाल्यार पांचवें मिरामारच्या शारदा मंदिराक फावो जालें. दीपक गाड आनी किरण नायक हांणी परिक्षक म्हूण काम पळयलें.
संपूर्ण वंदेमातरम सर्तींत 40 हायस्कुलांनी वांटो घेतिल्लो. ज्येश्ठ स्वातंत्र्य सैनीक रोहिदास (दाद) देसाय हांचे हस्तुकीं सर्तीचें उक्तावण केलें. ह्या वेळार डॉ. हेडगेवार हायस्कुलाच्या वेवस्थापनाचे अध्यक्ष कृष्णराव सुकेरकार, सचीव सुभाष देसाय, मुख्याध्यापक विलास सतरकार, पालक शिक्षक संघाचे अध्यक्ष लक्ष्मण वायंगणकार हाजीर आशिल्ले.
नामनेचे काळजा दुयेंस तज्ञ डॉ. शिरीश बोरकार, कला अकादमीचे वांगडी सचीव अरविंद खुटकार, डॉ. हेडगेवार हायर सेंकडरीचे प्राचार्य दीपक आमोणकार हांचे हाजिरेंत इनामां भेटवण सुवाळो जालो. रुचीता देसाय, चिन्मयी जोशी आनी अपर्णा सहकारी हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
