भांगरभूंय | प्रतिनिधी
ल्हानपणार एके घडणुकेक लागून तांकां संत्र्यांच्या पाटल्यांत शिक्षणाचें सपन दिसलें. ते फक्त तें पळोवन ओगी रावले नात, तर प्रत्यक्ष कृती करीत तांणी पयशे एकठांय केले आनी शाळा काडली. तांचें नांव हरेकला हजब्बा (66). तांकां पद्मश्री किताब मेळ्ळा. ते मुळचे गरीब. पायांत चप्पल ना, बरे कपडे नात, कोण पांयां पडलो जाल्यार ते अजून खाकुडले वरीं जातात. दरेके व्यक्तीन देशाचे सक्षम नागरीक जावपाक जाय, अशें तांकां दिसता. रस्त्या कडेन संत्री विकतना हरेकला हांणी मुळावी आनी माध्यमिक अश्यो दोन शाळा उबारल्यो. आतां तांकां उच्च माध्यमीक विद्यालय काडपाचें आसा.
हजब्बा हांकां रावपाक घर नाशिल्लें. हालींच दोगा जाणांनी तांकां रावपाक घर आनी एकल्यान सभाघर बांदून दिलां. हरेकला हांकां जो कितें पयसो मेळटा, अनुदान मेळटा, तें पुराय शिक्षणीक संस्थे खातीर खर्च करतात. जंय जंय वतात, थंय थंय शिक्षणा खातीर मजत मागतात. ते स्वता अशिक्षीत. तांचे कडेन एकल्या विदेशी मनशान इंग्लिशींत उलयत संत्री मागलीं. तेन्ना तांकां लज जाली. शिक्षण म्हणल्यार कितें ताचोय साक्षात्कार जालो. आपूण शिकूंक ना, पूण गांवांतलो दरेक भुरगो शिकपाक जाय, ह्या हेतून पेड्डापू – मंगळुराच्या हरेकला हजब्बान शाळा काडली. आयज तांचे शाळेंत दोनशीं भुरगीं शिक्षण घेतात.
हे शाळेक आनी हजब्बाक मेळपाक नवचेतना युवक संघाचे अध्यक्ष कृष्णा पालयेंकार, हसापुराचे सरपंच तुळशीदास गांवस, शाहू- फुले- आंबेडकर प्रतिष्ठानाचे महादेव गवंडी, साहित्यिक निवृत्ती शिरोडकार, निलेश नायक, सौ. रेखा निलेश नायक आनी पेडण्यांतले कांय तरणाटे गेल्ले. तांणी हजब्बा हांचो भोवमान केलो. तांची तुस्त, तोखणायूय केली.
हरेकला हजब्बा हांचो जल्म गरीब मुस्लिम कुटुंबांत जालो. पयशे नाशिल्ल्यान शाळा सोडून ते संत्री विकपाक लागले. तीं विकतना तांकां विदेशी नागरिकाचो वयलो अणभव आयलो. शिक्षण ना हाची लज दिसून तांणी संत्री विकून पयशे मेळटात, तातूंतल्यान बचत केली आनी गांवांत ल्हान शाळा सुरू केली. सरकारी मजत आनी कांय लोकांनी दिल्ल्या देणग्यांक लागून आयज ती शाळा उबी जाल्या. तिका ‘हजब्बा शाळा’ म्हूण वळखतात. तांकां लोक ‘अक्षर संत’ म्हूण पाचारतात.
वळख आनी सन्मान
साहित्यीक इस्मत पजीर हांणी हजब्बाचे जिणेचेर ‘अपरुपदा समाजसेवक’ हें पुस्तक बरयलां. मंगळूर विद्यापीठाच्या अभ्यासक्रमांत हजब्बाचो जिणे इतिहास आसा. बीबीसीन नोव्हेंबर 2012 त हजब्बाचेर ‘फळविक्रेत्यांचें भारतीय शिक्षणाचें स्वप्न’ ह्या माथाळ्याचो लेख छापला. सीएनएन आयबीएन तशेंच रिलायन्स फावंडेशनान ‘हियर हिरोज’ पुरस्कार तांकां भेटयला. ‘कन्नड प्रभा’ ह्या दिसाळ्यान तांकां ‘पर्सन ऑफ द इयर’ म्हूण घोशीत केल्यात. 2020 त भारत सरकारान हजब्बाक देशाचो चवथो सर्वोच्च नागरी किताब पद्मश्री भेटयला. देशभरांतल्या आघाडेच्या दिसाळ्यांनी तांचेर लेख बरयल्यात. तर अशे हे नम्र, सादे, निसुवार्थी समाजसेवक, हरेकला हजब्बा.
निवृत्ती शिरोडकार
98501 75509
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
