भांगरभूंय | प्रतिनिधी
27 डिसेंबर ते 1 जानेवारी मेरेन विवीध धर्मीक आनी संस्कृतीक कार्यावळींचें आयोजन
मडगांव:: फातर्पेंच्या श्री शांतादुर्गा कुंकळ्ळीकरीण संस्थानाची वर्सुकी जात्रा 27 डिसेंबर ते 1 जानेवारी 2023 मेरेन व्हडा उमेदीन मनयतले. ह्या निमतान विवीध धर्मीक आनी संस्कृतीक कार्यावळींचें आयोजन केलां, अशी म्हायती देवस्थान समितीचे अध्यक्ष कवेंद्र नायक देसाय हांणी पत्रकार परिशदेंत उलयतना दिली. ह्या वेळार सचीव विराज यशवंत देसाय, भांडारी दर्शन रामा देसाय, मुखत्यार सुभाष पळपुटो देसाय हाजीर आशिल्ले.
पयलो दीस मंगळार ता. 27 डिसेंबराक सकाळीं श्रीचो महाअभिशेक, रातचें नमन, शिबीकोत्सव, जागोर, आरती प्रसाद जातलो.
बुधवार ता. 28 डिसेंबराक सकाळीं श्रींचो महाअभिशेक, रातचो शिबीकोत्सव आनी श्रींची अंबारी रथांतल्यान मिरवणूक, आरती, प्रसाद आसतलो.
तिसर्या दिसा बेरेस्तार ता. 29 डिसेंबराक सकाळीं श्रीचो महाअभिशेक, कुंकुमार्चन, रातचो जागोर, शिबीकोत्सव, श्रींची फुलांच्या रथांतल्यान मिरवणूक, आरती, प्रसाद आनी ऑर्केस्ट्रा. शुक्रार ता. 30 डिसेंबराक सकाळीं श्रींचो महाअभिशेक, रातचीे श्रींची विजय रथांतल्यान मिरवणूक, आरती, प्रसाद. पांचवो दीस शेनवार ता. 31 डिसेंबराक सकाळीं श्रींचो महाअभिशेक, रातचो जागोर, शिबीकोत्सव आयोजीत केला.
1 जानेवारी 2023 दिसा फांतोडेर 6 वरांचेर श्रींची महारथांतल्यान मिरवणूक काडटले. उपरांत आरती आनी प्रसाद. उपरांत श्रीचो अभिशेक, रातचो शिबीकोत्सव, आरती, प्रसाद वाटपाची कार्यावळ जातली. देवीक अर्पण केल्ल्यो भांगराच्यो वस्तू आनी कपड्यांची पावणी 2 ते 6 जानेवारी मेरेन करतले, अशी म्हायती देवस्थानाचे अध्यक्ष कवेंद्र नायक देसाय हांणी दिली.
जात्रे निमतान येवपी भाविकां खातीर दर्शनाची वेवस्था, सुरक्षा रक्षक, येरादारी खातीर पुलीस, सीसीटीव्ही कॅमेरे बसयतले. जात्रेंत सगळ्या स्टॉल्स धारकांक प्लास्टीक वापरपाक बंदी आसतली. ह्या वर्सा प्लास्टीक मुक्त जात्रा करपाचो देवस्थान समितीन विचार केला अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
