श्रीलंकेच्या स्पिनराच्या जाळांत पाकिस्तान घुस्पलो

भांगरभूंय | प्रतिनिधी

येजमान श्रीलंकेन आपल्या बॉलरां नेटार पाकिस्ताना आड चालू आशिल्ले दुसरे टॅस्टीच्या दुसऱ्या दिसा आपली स्थिती घटमूट केली. पयले टॅस्टींत 342 धांवड्यांची राखण करपाक अपेशी थारिल्ल्या टिकेक तोंड दिवपी श्रीलंकेन पयल्या डावांत पाकिस्तानाचो स्कोर 7 बाद 191 असो केलो. श्रीलंकेन पयल्या डावांत 378 धांवड्यो केल्ल्यो अशे तरेन पाकिस्तान ह्या स्कोरा पसून अजून 187 धांवड्यांनी फाटीं आसा. श्रीलंके वतीन ऑफ स्पिनर रमेश मॅंडिसान 42 धांवड्यो दिवन तीन विकेटी घेतल्यो.

पयले टॅस्टींत पदार्पण करपी आघा सलमानान पाकिस्ताना वतीन सगल्यांत चड 62 धांवड्यो केल्यो. तो दिसाचे निमाण्या बॉलाचेर बाद जालो. ताका प्रभात जयसुर्यान तंबूंत धाडलो. जयसुर्यान 59 धांवड्यो दितना 2 विकेटी घेतल्यो.

कोरोनांतल्यान बरो जावन पंगडांत सामील जावपी फास्ट बॉलर असित फर्नांडोन पयल्याच बॉलाचेर अब्दुल्ला शफीकाक बाद केलो. जयसुर्यान उपरांत श्रीलंकेक मोठे येस मेळोवन दिलें. ताणें मुखेली बाबर आजमाक (16) बोल्ड केलो.

डिसिल्वान इमाम उल हकाक (32) बाद केलो. मॅंडिसान ते उपरांत तीन विकेटी घेवन पाकिस्तानाची मदली फळी गडगडावन उडयली. ताणें मोहम्मद रिजवान (24) आनी फवाद आलम (24) हांकां एलबीडब्ल्यू बाद केले. उपरांत मोहम्मद नवाज (12) हाका बाद केलो.

ते पयलीं श्रीलंकेन दिसाची सुरवात 6 बाद 315 धांवड्या वयल्यान केली आनी ताचो डाव 378चेर सोंपलो.

फास्ट बॉलर नसीम शाहान आदल्या दिसाचे नाबाद बॅट्समन दुनिथ वेलालागे (11) आनी निरोशन डिकवेला (51) हाका बाद केलो.

मॅंडिसान 35 धांवड्यो करून पंगडाचो स्कोर 350च्या मुखार व्हरपाक म्हत्वाचें योगदान दिलें. पाकिस्ताना वतीन नसीम शाह आनी यासिर शाह हांणी दरेकी तीन विकेटी घेतल्यो. दिमुथ करुणारत्ने जखमी आशिल्ल्यान ताचे सुवातेर डिसिल्वा कार्यवाहक मुखेलीची भुमिका वठयता.