भांगरभूंय | प्रतिनिधी
संवसारीक टी-20 सर्तीचे पात्रताय फेरयेंतले अ गटांतले मॅचींत श्रीलंकेन युएईक 79 धांवड्यांनी हारयलो. ह्या जैतान सुपर 12त सुवात मेळोवपाची श्रीलंकेची आस्त कायम उरली. श्रीलंके आपले पयले मॅचींत नामबिया ह्या दुबळ्या पंगडा कडल्यान हार घेवची पडिल्ली. ताका लागून सर्तींतलें आव्हान कायम दवरपाक युएई आडची मॅच जिखपाकूच जाय आशिल्ली.
श्रीलंकेन पयलीं बॅटींग करतना 20 ओव्हरींनी 8 विकेटी वगडावन 152 धांवड्यो केल्यो. ओपनर पथुम निशंकान सगल्यांत चड 74 धांवड्यो केल्यो. कुशल मॅंडिसान 33 धांवड्यो करून श्रीलंकेचो डाव सांबाळपाचो यत्न केलो. ह्या दोगांक सोडले जाल्यार श्रीलंकेच्या हेरांक म्हणपा सारकी बॅटींग करपाक जमली ना. युएईच्या मयप्पनान हॅट्रीक केली.
प्रत्युत्तर दिवपी युएईचो डाव 17.1 ओव्हरींनी 73 धांवड्यांचेर सोंपलो. श्रींलकेच्या बॉलरांनी सांघीक खेळपाचें प्रदर्शन घडयलें. युएईच्या एकाय बॅट्समनाक 20 परस धांवड्यो करपाक जमल्यो ना.
दुष्मंथा चमीरा आनी वानिंदू हसरंगा हांणी दरेकी 3 विकेटी घेवन युएईचो डाव गडगडावन उडयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
