भांगरभूंय | प्रतिनिधी
खबरां संस्था
होबार्टः टी- 20 वर्ल्ड कपाचे सुपर 12 चे सुरवात श्रीलंकेन जैतान केली. आयतारा होबार्टांत जाल्ले मॅचींत ताणी आयर्लंडाक 9 विकेटींनी हारयलें. टॉस जिखून पयलीं खेळून आयर्लंडान श्रीलंके सामकार जैता खातीर 129 धांवड्यांचें लक्ष्य दवोरले आनी ताणे ते एक विकेट वोगडावन सहज मेळयलें. दोनूय पंगड पात्रताय फेरी जिकून सुपर 12त पावल्यात. हे हारी उपरांत आयर्लंडा खातीर उपांत्य फेरयचो मार्ग कठीण जाला. कित्याक तर तांका आतां इंग्लंड, ऑस्ट्रेलिया आनी न्यूझिलंडा सारक्या पंगडां आड खेळपाचें आसा.
हे मॅचींत कुसल मेंडिसान श्रीलंके खातीर नाबाद 68 धांवड्यो केल्यो. धनंयज डिसिल्वा आनी मेंडीस हांणी पयले विकेटी खातीर 63 धांवड्यांची भागिदारी केली आनी हांगाच तांचे जैत निश्चीत जालें. धनंजय आनी चरिथ असलंकान दरेकी 31 धांवड्यो केल्यो. आयर्लंडा वतीन ग्रेथ डेलनन एक विकेट घेतली.
पलयीं बॅटींग करतना आयर्लंडाची सुरवात बाबत जाली. पॉवरप्लेंत दोन गडी वोगडावन तांणी फकत 40 धांवड्यो केल्यो. हे उपरांत टेक्टर सोडून खंयचोय बॅट्समन चड कांय करपाक शकलो ना. तांणी आपले 20 ओव्हरींत 8 बाद 128 धांवड्यो केल्यो. कॅप्टन बलबर्नी 1, टकर 10 आनी पॉल स्टर्लिन 34 धांवड्यो करून आवट जाले. टेक्टरान सगल्यांत चड 45 धांवड्यो केल्यो. श्रीलंके वतीन महेश तिक्षा आनी वनिंदू हसरंगान दरेकी दोन विकेटी घेतल्यो. लाहिरू कुमारा, फर्नांडो, चमिका करुणारत्ने आनी धनंयज डिसिल्वा हांणी दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
