भांगरभूंय | प्रतिनिधी
आशिया करंड सुपर चारांतले पयले मॅचींत श्रीलंकेन अफगाणिस्तानाक 4 विकेटीं हारयलो. अफगाणिस्तानान श्रीलंकेक जैता खातीर 176 धांवड्यांची मोख दिल्ली. ताणें ती 19.1 ओव्हरींनी मेळयली.
श्रीलंकेन गट पांवड्या वयले मॅचींत बांगलादेशा आड खेळटना 183 धांवड्यांचो फाटलाव केल्लो. आतां अफगाणिस्ताना आड 176 धांवड्यांचो फाटलाव केलो.
श्रीलंकेच्या कुसल मॅण्डीस (36) आनी पथुम निसंका (35) हांणी बरी सुरवात करून दिली. ते उपरांत दनुष्का गुणतिलका (33), भानुका राजपक्षे (नाबाद 31) हांणी आक्रमक बॅटींग करून श्रीलंकेचें जैत सोंपें केलें. अफगाणिस्ताना वतीन मुजीब उर रहमानान दोन विकेटी घेतल्यो.
ते पयलीं श्रीलंकेन टॉस जिखून पयलीं बॉलींग करपाचो निर्णय घेतलो. पूण, अफगाणिस्तानाच्या ओपनरांनी तांचो हो निर्णय चुकीचो थारायलो. ओपनर हझरतुल्ला झजाई आनी रहमानुल्ला गुरबाज हांणी 5 ओव्हरींनी 46 धांवड्यांची भागिदारी केली. ते उपरांत 16 बॉलांनी 13 धांवड्यांची सावकाश खेळी करपी झजाई बाद जालो. पूण, दुसरे वटेच्यान रहमानुल्लान आक्रमक बॅटींग करप चालूच दवरलें. ताणें 45 बॉलांनी 84 धांवड्यांची खेळी केली. हातूंत स सक्यांचो आनी चार चवक्यांचो आस्पाव आशिल्लो.
रहमानुल्लान दुसरे विकेटी खातीर इब्राहीम झादरान हाच्या वांगडा 93 धांवड्यांची भागिदारी केली. पूण, अफगाणिस्तान 150 धांवड्यांच्या लागसार पावलो तेन्ना असिता फर्नांडोन रहमानुल्ला गुरबाजाक 84 धांवड्यांचेर बाद केलो. ते उपरांत इब्राहीमान 37 बॉलांनी 40 धांवड्यो करीत अफगाणिस्तानाचो डाव 150च्या मुखार व्हेलो. ते उपरांत दिलशान मधुशंकान 18वे ओव्हरींत ताका बाद करून अफगाणिस्तानाक तिसरो धपको दिलो.
ते उपरांत अखेरचे ओव्हरींत नजीबुल्ला झादरान आक्रमक बॅटींग करपाक सुरवात केली. ताणें 10 बॉलांनी 17 धांवड्यो केल्यो. म्हत्वाच्या खिणाक तो बाद जालो. अखेरच्या दोन ओव्हरींनी श्रीलंकेच्या बॉलरांनी अफगाणिस्तानाच्या बॅट्समनांक बरे तरेन आडावन धरले. ताका लागून अफगाणिस्तानाक 20 ओव्हरींनी 6 बाद 175 धांवड्यां मेरेन मजल मारप शक्य जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
