भांगरभूंय | प्रतिनिधी
येजमान श्रीलंका पंगडान आशिया करंड क्रिकेट सर्तीच्या सुपर चारांतले आपले पयले मॅचींत बांगलादेशाक 21 धांवड्यांनी हारयलो. पाकिस्तान आनी श्रीलंका ह्या पंगडांनी सुपर चारांतली दरेकी एकेक मॅच जिखून आपल्या खात्यांत 2-2 गूण जमा केल्यात. ताका लागून भारता वयलें चेपण वाडलां. जाल्यार दुसरे हारीक लागून बांगलादेशाचें सर्तींतलें आव्हान लागीं लागीं सोंपिल्ल्यांत जमां जालां.
श्रीलंकेन दिल्ले 258 धांवड्यांचो फाटलाव करतना बांगलादेशाक 48.1 ओव्हरींनी 236 धांवड्यां मेरेन मजल मारप शक्य जालें.
मोखीचो फाटलाव करपी बांगलादेशान सातवे सुवातेर बॅटींग करपी मेहदी हसन मिराजाक हे मॅची खातीर डावाची सुरवात करपाक धाडलो. ताणें मोहम्मद नईम सयत पंगडाक बरी सुरवात करून दिली. दोगांयनी पयले विकेटी खातीर 55 धांवड्यांची भागिदारी केली. अखेरेक मिराझ 28 धांवड्यो करून बाद जालो. लिटस दास (15) आनी मुखेली शाकिब अल हसन (5) अपेशी थारले. नईम बाद जाल्या उपरांत श्रीलंका ही मॅच सहज जिखतलो अशें दिशिल्लें. पूण, मुश्फिकर रहिम आनी तोवहीद ह्ृदोय हांणी उत्कृश्ट भागिदारी करून बांगलादेशाची आस्त कायम दवरली. 112 बॉलांनी 72 धांवड्यांची ही भागिदारी श्रीलंकेचो मुखेली शनाकान फोडली. रहीम 29 धांवड्यांचेर बाद जालो. रहीम बाद जाल्या उपरांत बांगलादेशा वयलें चेपण वाडलें. ह्ृदोय आशिल्ल्यान बांगलादेशाची आस्त कायम आशिल्ली. पूण, तो बाद जाल्या उपरांत बांगलादेशाची उरिल्ली सगली आस्त सोंपली.
ते आदीं टॉस हारल्या उपरांत पयलीं बॅटींग करतना श्रीलंका पंगडान कुशल मॅण्डिस आनी सदीरा समरविक्रमा हांच्या अर्द शेंकड्यांच्या नेटार 9 विकेटी वगडावन 257 धांवड्यो केल्यो.
मॅण्डिसान 73 बॉलांनी 6 चवके आनी एक सक्याचे मजतीन 50 धांवड्यो केल्यो, जाल्यार समरविक्रमान 72 बॉलांनी आठ चवके आनी दोन सक्यांचे मजतीन 93 धांवड्यांचें योगदान दिलें. बांगलादेशा वतीन हसन महमूदान तीन, शोरीफूल इस्लामान आनी तस्कीन अहमदान दरेकी दोन विकेटी घेतल्यो.
श्रीलंकेची सुरवात म्हणपा सारकी बरी जाली ना. 34 धांवड्यांचेर पयली विकेट पडली. चवथे ओव्हरींत दिमुथ करुणारत्ने 18 धांवड्यो करून हसन महमुदाचो शिकार थारलो. ते उपरांत निसंका आनी कुशल मॅण्डिस हांणी डाव सांबाळटना दुसरे विकेटी खातीर 74 धांवड्यांची भागिदारी केली. मॅण्डिसान सेगीत दुसरे मॅचींत अर्द शेंकड्याची खेळी केली. मॅण्डिस बाद जाल्या उपरांत निसंका 60 बॉलांनी 40 धांवड्यो करून तंबूंत परतलो. चरिथा असंलका (10) आनी धनंजया डिसिल्वा (6) हांकांय अपेल आयिल्ल्यान श्रीलंकाचो पंगड संकश्टांत सांपडिल्लो. पूण, सदीरान सातत्य दाखोवन अर्द शेंकडो पुर्ण करून पंगडाक बरी धांवसंख्या उबारून दिवपाक हातभार लायलो. ताका मुखेली दासून शनाकाची बरी साथ मेळ्ळी. दोगांयनी 60 धांवड्यांची भागिदारी केली. अखेरेक हसन महमुदान ही जोडी फोडली. दासून 32 बॉलांनी 24 धांवड्यो करून बोल्ड जालो.
दुनिथ वेलालागे तीन धांवड्यो करून धांवबाद जालो. पूण, समीरविक्रमान एक बाजू सांबाळून जबरदस्त खेळ केलो. समरविक्रमान 93 धांवड्यो केल्यो. अशे तरेन श्रीलंकेन 50 ओव्हरींनी 9 विकेटी वगडावन 257 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
