भांगरभूंय | प्रतिनिधी
खबरां संस्था
तिरुवनंतपूरमः पयल्या दोन वन-डें मॅचींत जैत मेळोवन तीन मॅचीचें माळेंत 2-0 अशी आघाडी घेतिल्ल्या भारतीय पंगडान तिसरे वन-डेंत 317 धांवड्यांनी सहज जैत मेळोनव श्रीलंकेक क्लीन स्वीप दिलें. 166 धांवड्याची नाबाद खेळी करपी विराट कोहलीक मॅन ऑफ दी मॅच, आनी मॅन ऑफ दी सिरिज हे दोट्टी पुरस्कार फावा जालें. मोहम्दस सिराजान 32 धांवड्यांत श्रीलंकेच्या 4 बॅट्समनांक आवट करून जैतांत म्हत्वाची कामगिरी केली. मोहम्मद सामी आनी कुलदीप यादवान दरेकी 2 विकेटी घेतल्यो.
भारताच्या 390 धांवड्यांच्या चेंपणा खाला खेळटना श्रीलंकेचो बॅट्समन सुरवेक सावन तकली वयर काडपाक शकले नात. तांचो डाव कोसळत गेलो. पयल्या पॉवर प्लेंत 37 धांवड्यांत ताचो अर्दो पंगडा पॅव्हलियनांत परत आयलो. नुवानिदू फर्नांडो, कसून रजिथा आनी कॅप्टन दासुन शनाक हे सोडल्यान बाकीच्या बॅट्समनांक दोन आंकडी धांवड्यो करपाक मेळ्ळ्यो नात. फर्नांडोन सगल्यांत चड 19 धांवड्यो केल्यो. श्रीलंकेचो डाव फकत 73 धांवड्यांत सोपलो.
भारतान 3-0 अशी माळ जिखली. भारतीय क्रिकेटीच्या इतिहासांत भारताचें हें सगल्यांत व्हडले जैत. हाचे पयलीं न्यूझिलंडान आयर्लंडाक 290 धांवड्यांनी ऑस्ट्रेलियेन अफगाणिस्तानाक 275 धांवड्यांनी दक्षीण आफ्रिकेन झिम्बाब्वेक 272 धांवड्यानी आनी श्रीलंकेन 258 धांवड्यांनी हारयलें. भारतान आयतारा श्रीलंकेचेर मेळयल्लें 317 धांवड्याचें जैत सगल्यां परस व्हड आसा.
विराट- शुभमनाचे शेंकडे
श्रीलंके आडचे तिसरे वन-डेंत विराट कोहली आनी शुभमन गिलान श्रीलंकेच्या बॉलरांक सामकें धुवलें. तिरुवनंतपुरांत तांच्या खेळाचें वादळ पळोवपाक मेळ्ळें. विराटान देड शेंकडो आनी शुभमन गिलान वन-डे कारकिर्दींतलो दुसरो शेंकडो केलो. ताचे खेळीच्या नेटार भारतान आपल्या डावांत 390 धांवड्यांचो दोंगोर उबारलो.
कॅप्टन रोहीत शर्मान टॉस जिखून बँटिंग घेतली. शुभमनान शेंकडो करून कॅप्टनाचो निर्णय सारको आशिल्लो हें दाखोवन दिलें. ओपनर रोहीत शर्मा आनी शुभमनान 95 धांवड्यांची सलामी दिली. रोहिताक अर्द शेंकडो करपाक आठ धांवड्यो कमी पडल्यो. करुणारत्नेन आविष्का फर्नांडो वरवीं ताका कॅच आवट केले. ताणें 49 बॉलात 42 धांवड्यो केल्यो. शुबमन गिलान 89 बॉलांत शेंकडो केलो. तागेलो भारतांतलो हो पयलो आंतरराष्ट्रीय शेंकडो आसा. हाच्या पयलीं ताणे झिम्बाब्वेत शेंकडो केल्लो. विराट कोहलीन 48 बॉलांत वन-डेंतलें आपलें 65वो अर्द शेंकडो पुराय केलो. शुबमन 97 बॉलांत 116 धांवड्यो करून रााजिथानाच्या बॉलार बोल्ड जालो.
विराट आनी शुभवमान श्रीलंकेच्या बॉलरांक सामको घाम हाडलो. दोगांय मदीं बरो ताळमेळ दिसून आयलो. तांणी दुसरे विकेटी खातीर 131 धांवड्यांची भागिदारी केली. भारताच्या डावांतल्या 6वे ओव्हरींत तांणी स्पिनर लाहिरू कुमाराक फोडून काडलो. विराटान 110 बॉलांत नाबाद 166 धांवड्यो केल्यो. सातूंत 8 सके आनी 13 चौके आशिल्लेय हे वन-डे माळेंतलें विराटाचो हो दुसरो शेंकडो आनी आंतरराष्ट्रीय कारकिर्दींतलो 74वो शेंकडो आसा. श्रेयस अय्यर (38), केएल राहुल (7) आनी सूर्यकुमार यादव (4) रोखडेच आवट जाले. भारताचो डाव 5 बाद 390 असो सोपलो. कसून राजिथान आना लाहिरू कुमारान दरेकी 2 विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
