भांगरभूंय | प्रतिनिधी
२७२ किल भांग, ३५ किल गांजा आनी ९ किल हेरॉइन जप्त
श्रीलंका, खबरां संस्था ः ड्रग्स तस्करी प्रकरणांत कारवाय करून श्रीलंकेन 15 हजार लोकांक ताब्यांत घेतल्यात. ह्या काळांत सुमार 440 किल घुंवळें वखदां जप्त केल्यात. हातूंत २७२ किल भांग, ३५ किल गांजा आनी ९ किल हेरॉयन हांचो आस्पाव आसा.
श्रीलंकेच्या पुलिसांच्या म्हणण्या प्रमाण अटक केल्ल्यांतले 13 हजार 666 जाण ह्या तस्करी प्रकरणांत दुबावीत आसात, जाल्यार सुमार 1100 जाण ड्रग्स व्यसनी आसात. व्यसनांतल्यान बरे जावपा खातीर तांका लश्करी सुविधेंत धाडला. खरें म्हणल्यार श्रीलंकेंतल्या ड्रग्स वेपाऱ्यांचेर बंदी घालपा खातीर युक्तिया (म्हळ्यार न्याय) नांवाची खाशेली मोहीम ह्या म्हयन्यांत सुरू केल्ली.
भारतीय नौदला वांगडाच भारताच्या नार्कोटिक्स कंट्रोल ब्युरोन श्रीलंका आनी मालदीव हांचे वांगडा ऑपरेशन समुद्रगुप्ताचेरूय काम केलें. एकामेकां कडेन म्हायती वांटून घेतिल्ल्यान श्रीलंकेच्या नौदलान डिसेंबर 2022 आनी एप्रिल 2023 त दोन कारवाय केल्यो. हातूंत 286 किल हेरॉयन आनी 128 किल मेथॅम्फेटामायन जप्त करून 19 ड्रग्स वेपाऱ्यांक अटक केली. तशेंच मालदीव पुलिसांनी मार्च म्हयन्यांत 4 किल हेरॉइन जप्त करून 5 वेपाऱ्यांक अटक केल्ली.
सगळ्यांत व्हडलो साठो 2016 वर्सा जप्त
डिसेंबर 2016 वर्सा श्रीलंकेंत अमली पदार्थांचो सगळ्यांत व्हडलो सांठो जप्त केल्लो. तेन्ना पुलिसांनी सुमार 800 किल कोकेन जप्त केल्लें. तेन्ना ताची किंमत सुमार 898 कोटी रुपया आशिल्ली. श्रीलंकेंत 2015 ते 2018 ह्या काळांत सुमार 1700 किल ड्रग्स जप्त केल्यात.
2021 वर्सा श्रीलंकेच्या नौदलान खासा कारवाय करून 200 किल हेरॉइन जप्त केल्लें. तेन्ना ताचें मोल 160 कोटी रुपया आशिल्लें. ह्या प्रकरणांत 9 जाणांक अटक केल्ली. हीं वखदां पाकिस्तानांतल्यान धाडिल्लीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
