भांगरभूंय | प्रतिनिधी
ऑस्ट्रेलियेंत चालू आशिल्ले संवसारीक टी-20 सर्तींतल्यो पात्रताय अ गटांतल्यो मॅची सोंपल्यो. श्रीलंका आनी नॅदरलॅण्ड ह्या पंगडांनी सुपर 12त सुवात मेळयली. काल जाल्ले पयले मॅचींत श्रीलंकेन नॅदरलॅण्डाक 16 धांवड्यांनी हारयलो, जाल्यार युएईन नामिबियाचें आव्हान 7 धांवड्यांनी सोंपयलें. अशे तरेन श्रीलंका तीन मॅचींतल्यान चार गूण घेवन पयली सुवात मेळयली. नॅदरलॅण्ड जरी श्रीलंके कडल्यान हारलो आसलो तरी सुरवातीच्यो दोन मॅची जिखून तीन मॅचींतल्यान 4 गूण जाले. उत्कृश्ट नेट रन रेटीच्या आदाराचेर श्रीलंकेन पयली आनी नॅदरलॅण्डान दुसरी सुवात मेळयली.
श्रीलंकेन पयली बॅटींग करतना 162 धांवड्यो केल्यो. ताच्या ओपनरांनी बरी सुरवात करून दिली. पंगडान बिनबाद 36 धांवड्यो केल्यो. ओपनर कुशल मॅंडिसान 79 धांवड्यांची खेळी केली. मदले फळयेंतले बॅट्समन चरीथ असलंका आनी भनुका राजपक्षे हांणी वळेरेन 31 आनी 19 धांवड्यो केल्यो.
ते उपरांत श्रीलंकेच्या बॉलरांनी लेगीत बरें प्रदर्शन केलें. ताच्या बॉलरांनी थारावीक अंतरान नॅदरलॅण्डाच्यो विकेटी घेतल्यो, ताका लागून मोखीचो फाटलाव करपी नॅदरलॅण्डाक 20 ओव्हरींनी 9 विकेटी वगडावन 146 धांवड्यो करपाक जमल्यो.
दुसरे मॅचींत युएईन टॉस जिखून पयलीं बॅटींग करपाचो निर्णय घेतलो आनी निर्धारीत 20 ओव्हरींनी 3 विकेटी वगडावन 148 धांवड्यो केल्यो. ओपनर मोहम्मद वासिमान 41 बॉलांनी अर्द शेंकडो नोंदयलो. जाल्यार मुखेली रिझवानान 29 बॉलांनी नाबाद 43 धांवड्यो केल्यो. अरविंद आनी बसिल हमीद हांणी वळेरेन 21 आनी 25 धांवड्यांचें योगदान दिलें. नामिबिया वतीन विजे, बेन शिकोंगो आनी स्कॉल्ट्झ हांणी दरेकी 1 विकेट घेतली.
149 धांवड्यांची मोख घेवन मैदानांत देंवपी नामिबियाची सुरवात बाबत जाली. तांणी पावर प्लेंत 26 बॉलांनी 3 विकेटी वगडायल्यो. युएईन थारावीक अंतरान धपके दिवप चालूच दवरले. तांणी 46 धांवड्यांचेर अर्दो पंगड तंबूंत धारलो. युएईच्या जहूर खानान नामिबियाक आनीक दोन धपके दीत तांची अवस्था 7 बाद 69 अशी केली. ते उपरांत नामिबियाच्या डॅव्हीड विजे आनी रुबेन थ्रमपेलमान हांणी खर प्रतिकार करतना अर्द शेंकड्याची भागिदारी केली. विजेन अर्द शेंकडो नोंदोवन मॅच 6 बॉलांनी 14 धांवड्यो अशी लागसार हाडली.
तातूंत युएईक अपेक्षीत ओव्हरींची गती राखपाक जमूंक नाशिल्ल्यान अखेरचे ओव्हरींत ताका फक्त चार फिल्डर शिमे लागसार दवरचे पडले. पूण, हाचो फायदो नामिबियाक घेवपाक जमूंक ना आनी अखेरेक सात धांवड्यांनी हार घेवची पडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
