भांगरभूंय | प्रतिनिधी
आषाढ म्हयनो सोंपलो म्हणटगीर, जो पयलो आयतार येता ताका श्रावणी आयतार अशें म्हणटात. ह्या म्हयन्यांत हिन्दू लोकांचे खूब सण येतात. नागपंचम, रक्षाबंधन आनी तातूंतलोच एक म्हणल्यार श्रावण आयतार. श्रावणांतले चारूय आयतार बायलो पूजतात. कांय बायलो खंयचेय दोन आयतार पूजतात आनी कांय जाण चारूय आयतार पूजतात. चड करून नवीच लग्न जाल्ली बायल.
ह्या आयताराक सवायशीण बायलो पांच तरेच्या फुलां झाडांची पानां, फुलां, पत्री, बेल, पानां विडो (पान आनी सुपारी) ह्यो सगळ्यो वस्तू एके शिरतेर (केळीचें फुडलें पान) वा आळवाच्या पानार मांडटात आनी तें पान पाटार दवरतात. शिरवड्याच्या पानाचो , खावच्या पानाचो वा केळीच्या खोल्याचो (केळीच्या पानाचो एके सायडीन काडिल्लो कुडको) एक दोणो करतात आनी ताका कितेंय भांगराची वस्त जशी नाकाची काडी, सरपळी, कानातलें आदी वस्तू घालतात.
आदल्या तेंपार हो आयतार पुजतालीं त्या जाग्यार शेण सारोवन तो जागो नितळ करताली आनी वणटीर एकाद्रे झाडाचें, फुलाचें चित्र काडटाली आनी थंय तो आयतार पुजेक लायतालीं, पाटाचे भोंवतणी सोबीत रांगोळी घालतालीं. पयलो, दुसरो, तिसरो आनी चवथो अशे चार आयतार आसतात. पयलो आयतार आसा तो नेणटो आयतार, अशें म्हण्टात आनी ताका निवेद्य आसता तो पातोळ्यांचो. (हळदीच्या पानांचेर तांदळाचे पीठ लावन ताचेर चून्न घालून ते दोडटात आनी एका आयदनांत घालून उकडटात). दुसऱ्या आयताराक दोण्याचो निवेद्य (पणसाच्या पानांचो दोणो करतात आनी ताका पीठ लावन भितर सोयेचे चून्न घालतात आनी वयल्यान ताका परत पीठ लावन तो बंद करतात आनी एका आयदनान घालून तो उकडटात.)
तिसऱ्या आयताराक मुठली करतात (तांदळा पिठाचो गोल गुळो करतात. तातूंत चून्न घालतात आनी ते उकडटात). चवथ्या आयताराक जाणटो आयतार म्हणटात आनी त्या दिसा ताका पोळे करतात आनी ताका बेगीन पावोवपाक जाय कारण तो जाणटो आनी ताका दोळ्यांनी उणें दिसता आसो समज आसा.
हातूंत आयतार पावोवप असो एक उल्लेख आयला. जातूंत बायलो हो आयतार तुळशींत पावयतात. पयलो आयतार पावोवपाक वेळ जाल्यार चलता. कारण तो नेण्टो आसता. पूण जाण्ट्यांक बेगीन पावयतात. जरी चारुय आयतार पूजपाची तरा एकाच
सारकी आसली तरी सुद्दा तांकां ताचो निवेद्य वेगळ्या पद्धीतीचो आसता. पूण, चारुय जिनस आसतात ते तादळांचे आनी चडशे उकडिल्ले. पयलीच्या तेंपार लोक चडांत चड शेतकार आशिल्ले वा हेर कसलो धंदो करताले आनी बार्टर सिस्टम (अदलाबदल
करप) आशिल्ली. तर तेन्ना सगळ्यांच्या घरांत चडांत चड कितें आसतालें तें म्हणल्यार तांदूळ आनी नाल्ल. कसलीय वस्त जर जाय जाल्यार ती हाडपाक चलत शारांत वच्चें पडटालें. पावसाच्या दिसांनी चलत वचप शक्य नासलें आनी त्या तेपार तेलाचोय चड वापर
जायनासलो. जातालो तोवूय खोबरेल तेलाचो (माडाच्या सुकिल्लो नाल्ल म्हणल्यार खोबरें, ताचे पसून तेल काडटात.) वापर. ताका लागून त्या आदल्या तेंपार चालू केल्ली तांदळाच्या वस्तूंचो/ जिनसांचो निवेद्य आयज मेरेन चालू आसा. गोंयांत जाल्यार तांदूळ वा नाल्ल नासतना गोंयकारांनी कसलीच परब पुराय जायना. हाकाच लागून घडये लोक आयज मेरेन शेत करतना दिश्टी पडटात.
लक्षता मातोणकार
8698687306
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.