भांगरभूंय | प्रतिनिधी
भांगरभूंय । प्रतिनिधी
वाळपयः शेळ- मेळावलींत आयआयटी विरोधी आंदोलना वेळार आंदोलकांनी पुलिसांचेर फातोर शेवटून मारिल्ल्या गुन्यावा खाला सरकारान न्यायालयांत दाखल केल्ले केसीचे सुनावणेक वाळपयच्या पयलो वर्ग न्यायालयांत 11 जानेवारीक सुरवात जातली. न्यायालयात ह्या हिंसाचरांत घुस्पल्ल्या 22 आंदोलकांक नोटिशी धाडून 11 जानेवारीक न्यायालयांत हाजीर रावपाक सांगलां.
आंदोलकांनी पुलिसांचेर शेवटिल्ले फातर लागून स बायल पुलीस जखमी जाल्ल्यो. पुलिसांनी ह्या वेळार आंदोलकांचेर लाठी हल्लो केल्लो. लोकांनी केल्ल्या आंदोलनाक लागून सरकाराक शेळ- मेळावलींत आयआयटी प्रकल्प उबारपाचो रद्द करपाचो निर्णय घेवचो पडिल्लो. आंदोलकांचेर नोंद केल्ले गुन्यांव फाटीं घेवपाचे मागणे खातीर लोकांनी परत आंदोलन केल्लें. मात ताची दखल घेनास्तना सरकारान न्यायालयांत आरोप पत्र दाखल केल्लें आनी आतां केशीचे सुनावणेक सुरवात जावपाचे फांटभुंयेर गांवांत परत खोवदोळ जावपाची शक्यताय आसा. जो मेरेन केस फाटीं घेनात तो मेरेन आयआयटी विरोधी आंदोलन पालोवचें ना अशी शिटकावणी ह्या वाठारांतल्या आंदोलकांनी दिल्या.
शेळ- मेळावलींत आयआयटी प्रकल्प उबारपाक थळाव्या लोकांनी विरोध करून व्हडलें आंदोलन केल्लें. सुमार चार म्हयने आंदोलक रस्त्यार आयिल्ले. आयआयटी खातीर शीम निश्चीत करपाचें काम हातांत घेतिल्लें तेन्ना लोकांनी ताका विरोध केल्लो. त्या वेळार एका पुलीस अधिकारी एके बायलेचे हड्ड्यार पाय दवोरलो अशें सामकार येतगीर हें आंदोलन खर जाल्लें. आंदोलकांक आडावपा खातीर पुलिसांनी तांचेर लाठी हल्लो केल्लो. ताका जाप म्हणून आंदोलकांनी तांचेर फातर शेवटून मारिल्ले. तातूंत स बायल पुलीस जखमी जाल्ल्यो. हे संबंदी वाळपय पुलीस स्टेशनांत 22 जाणांचेर गुन्यांव नोद करुन आरोप पत्र सादर केल्लें.
आंदोलकांचेर दाखल केल्ले गुन्यांव सरकारान फाटीं घेतले नात उरफाटें तांकां न्यायालयात हाजीर रावपाच्यो नोटिशी धाडिल्ल्यान शेळ- मेळावलींतलें वातावरण परत एक फावट तापपाची शक्यताय आसा. आयआयटी आंदोलनांचें फुडारपण करपी सिद्धू गांवकार हालींच जाल्ले पंचायत वेंचणुकेंत पंच वागडी म्हणून वेंचून आयलें आनी ताणे थळावो आमदार विश्वजीत राणे हांका आपलें समर्थन दिल्लें. अश्या वेळार न्यायालयाची नोटिशी आयिल्ल्यान विश्वजीत राणे हे कसली भूमिका घेतात हाचे कडेन थळाव्या लोकांची सध्या नजर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
