भांगरभूंय | प्रतिनिधी
सुभाष शिरोडकार: शेतां पडींग उरचीं न्हय होच सरकाराचो हेतू
म्हापशें: शेतकार शेतां कडेन, बागायती कडेन वळचे ह्या बऱ्या हेतून सरकार जमनी ताब्यांत घेतलें अशें उलोवप आमी केल्लें. पडींग जमीन सरकार आपल्या ताब्यांत घेवपाची तरतूद कायद्यांत हाचे पयलींच आसा. शेत जमीन पडींग दवरची न्हय अशें आमकां दिसता. पूण आमकां शेतां ताब्यांत घेवपाचीं नात अशें स्पश्टीकरण उदका स्रोत मंत्री सुभाष शिरोडकार हांणी दिलें.
पर्रा माडांनी तळ्याच्या सोबितीकरणाचे कार्यावळी उपरांत मंत्री शिरोडकार पत्रकारां कडेन उलयताले. ह्या वेळार विरोधी पक्ष फुडारी मायकल लोबो, पर्राचे सरपंच चंदानंद हरमलकार, उपसरपंच डॅनियल लोबो, पंच वांगडी आनी उदका स्रोत खात्याचे अधिकारी हाजीर आशिल्ले. ह्या सोबितीकरणाचेर 20 लाख रुपया खर्च केला.
जमीन पडींग दवरून शेतकारांचें उत्पन्न केन्नाच दुपेटीन जावचें ना. उत्पन्न वाडी खातीर शेतकारांनी जमीन कसचीच पडटली. पडींग जमीन दवरप हो एके तरेचो गुन्यांव अशें म्हाका दिसता अशें शिरोडकार हांणी स्पश्ट केलें.
आमी खूबशे फावटी ल्हान भुरग्यांक ओगी बसात, नाजाल्यार बडयेन मारतलों अशें म्हणटात. पूण तशें केन्नाच करिनात. तशेंच सरकार अशें कांयच करचें ना. फक्त शेतकारांनी शेती वेवसाया कडेन वळचें होच ताचे फाटलो बरो हेतू आसा. आमी ह्यो जमनी ताब्यांत घेवचे नात अशें मंत्री शिरोडकार हांणी म्हणलें.
पर्रा गांवांतलीं काळगां खूब प्रसिद्ध आसात. ताचें आमी ब्रॅण्डींग करूंक जाय. गोंयांत आनिकूय हेर पिकां आसात जाचें ब्रॅडींग करप गरजेचें आसा. म्हापशेंचे चवळीची लेगीत जायरात जावंक जाय. सद्या गोंयांत चवळी मेळनाशिल्ल्यान आयात करची पडटा. दरेक गजाल भायल्यान आयात केल्यार गोंयकारांनी करप कितें. दरेकान आपले जमनीची राखण करची. तो तांचो अधिकार आसा. पूण पडींग जमीन लागवडी खाला हाडूंकच जाय अशें मत शिरोडकार हांणी उक्तायलें.
पंच वांगडी, जिल्हो पंचायत वांगडी आनी आमदार ह्या लोकप्रतिनिधींनी फुडाकार घेवन, पडींग शेतां लागवडी खाला हाडपा खातीर लोकांक प्रोत्साहन दिवचें. सरकारान खारजा वरवीं गोंयांत उदक पावयलां. पूण एखादी गजाल वापर नासतना पडून उरल्यार ताचो परिणाम जाताच. तशीच स्थिती तिलारीच्या खारजाची जाल्या. गरज आसा थंय दुरुस्तीचे निर्देश आमी दिल्यात. तिलारी आनी अणजूणें धरणाक लागून उत्तर गोंयची तान भागता. सत्तरींत धरणाच्या उदकाक लागून शेतां, बागायतींची लागवड जाता अशें सुभाष शिरोडकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
