भांगरभूंय | प्रतिनिधी
सरकाराच्या सवलतींचो फायदो घेवूंया आनी शेतकामता वरवीं देसाचे प्रगतीची बुन्याद आदीक घट, बळिश्ट करूंक आमी भागीदार जावूंया.
आमी म्हणटांव की संवसार दिसान दीस सुधारत वेता म्हूण. मनीस नव्यो- नव्यो येवजणो घडोवन हाडटा. आनी आपल्या सुधारपणाचें प्रदर्शन करता. बरी गोश्ट ही. पूण ह्या सुधारपणाच्या नांवान मनीस जायत्या सुवातांचेर चुकता ताचेर तो मातूय लक्ष दिना. इतलेंच न्हय तर तो आपूण चुकता म्हूण पर्यान मानून घेवंक कबूल आसना. एक उदाहरण म्हणल्यार आमचें शेतकामती. शेतकामत करूंक आयची पिळगी सारकी फाटीं आसा. जायतीं कारणां आसात पूण शेतान वचून वावरूंक सारकें खालतेंपण दिसता. शेतकामत केलें ना जाल्यार आरोव खंयच्यान येतलो. काय?
आदल्या काळार
शेतकामत करप आमच्या पुर्वजांचो मुखेल वेवसाय आसलो. शिक्षण शिंपडूंक नाशिल्ल्या कारणान उद्देग- धंदे स्थापन जांवक नासलेत. आनी त्या खातीर सगळे घराबे पिकावळ पिकोवन जिवीत सारतालेत. एकूच पिकावळ न्हय पूण दोन आनी तीन पर्यान पिकावळी काडटाले, आनी पेल्याक तसो पेल्यांक धादोशी दवरताले. त्या काळार चड शेतां आशिल्ल्या मनशाक अदीक गिरेस्त म्हणटाले आनी ताका समाजांत व्हडलो रेस्पेत आनी मान मेळटालो. हाका लागून आदल्या काळार मनीस खंयच्यानय जमीन कसल्या शिवाय रावनासलो. आनी खंयसरूंच पाड सुवात सल्यार त्या जमनीची तरेकवार पिकावळ उत्पन्न करूंक वापर करतालो.
आयज सगलें बदल्लां
आयच्या काळार सगलें बदल्लां. शिक्षण पसरिल्ल्या कारणाक लागून तरेकवार धंदे स्थापन जाल्यात. हाका लागून आयचो तरणाटो कचेरेंत आनी फॅक्टरींनी शिर्वीस करूंक धांवता. शेतकामत करूंक तो सारकोच लजता. आशिल्लीं शेतां पाड दवरता. आनी जाता जाल्यार तीं पुरोवन व्हडलीं बिल्डिंगां बांदपाक फाटीं सरना. आदीं शेतां आसल्यार गिरेस्तकाय आसताली. पूण आयज ती परिस्थिती ना. पूण मनीस कितलो म्हूण दुडवां फाटल्यान धांवतलो काय? आमी शेतां पुरयतात ताका लागून पर्यावरणाचो कितलो इबाड जाता ताचो आमकां अदमास ना. पूण ज्या दिसा आमच्या जिविताचेर, आमकां कळटा तसो, वायट परिणाम जातलो तेन्ना मात आमचे लागीं तें नश्ट निवारूंक वेळूंय आसचो ना न्हय म्हूण उपाय आसचेनात.
वावराचो अभिमान
त्या खातीर आसात तीं शेतां, भाटां आमी सांबाळूंन दवरूंक वावरूंया. आदले परीं तांचो वापर करून पिकावळ उत्पन्न करूंक प्रयत्न करूंया. कसल्याच वावरांत खालतेंपण ना. अभिमानान शेतांनी वावर करून दुस-यांक उदाहरण दिवया. हांव जाणां, हें सांगपाक सोंपें पूण करपाक कठीण म्हण. तरीय पूण, जो शेतकामत करता तोच एका काळार जैतिवंत जातालो म्हण म्हजे विचार म्हाका सांगतात. जर कोट्यांनी दुडू आसले आनी विकते घेवन जेवपाक भाटाचे गोटे नासलेत जाल्यार त्या दुडूवांचें मोल कितें?. फुडाराक ही परिस्थिती जेरूल येतली. आनी आयच्या काळार आमी आदारिल्ल्या वायट करण्यांचें फळ आमचे फुडले पिळगेक भोगचें पडटलें.
आयचें शेतकामत
शेतकामत आमच्या देसाच्या प्रगतीची बुन्याद जावन आसा. आयचें शेतकामत म्हणल्यार फकत एग्रीकल्चरुच न्हय. हॉट्रिकल्चर वा फळांची पिकावळ, फ्लाॅरीकल्चर वा फुलांची पिकावळ आदीं तरांनी हें शेतकामत लांब आनी रुंद जाल्लें आसा. आयज गोंयकारां मदीं एक बरी संवय दिश्टी पडटा. आनी ती संवय म्हणल्यार फुलांचो मोग आनी फळांचो वापर. आयज प्रत्येक घरांत आमकां फुलांची गरज पडटा. आमी आमचीं जार्दिनां फुलांनी भरतात. आनी आमी आमचीं घरां तरेकवार फुलांनी सजयतात. फळां भलायकेक बरीं म्हणून आमी आमच्या जिवितांनी फळांचोय खूब वापर करतांव. अशें आशिल्ल्या कारणान फुलांचो आनी फळांचो धंदो मोठ्या प्रमाणें आयज गोंयांत चलता तो आमच्या दोळ्यांक दिसता.
भागिदार जावूंया
ह्या धंदेकाराक सरकारूय दुडवांचो खूब आदार दिता. पूण हो फायदो कोण घेता? नदर मारून पळयात. आयज फ्लॉरिकल्चर आनी हॉट्रिकल्चर गोंयांत कोण चलयतात? आमचे गोंयकार भाव भोव थोडे. बिगर-गोंयकार हो धंदो गोंयांत करतात आनी आपलें जिवीत पर्जळींत करतात आनी आमी तें पळेतांव. कितल्या गोंयकांरांनी हाचेर विचार केला काय? सरकाराच्या सवलतींचो फायदो घेवूंया आनी शेतकामता वरवीं देसाच्या प्रगतीची बुन्याद अदीक घट, बळिश्ट करूंक आमी भागीदार जावूंया.
(लिप्यांतर ः विशाल खांडेपारकार, 8080622370)
तोमाझिन कार्दोज
9822170102
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
