भांगरभूंय | प्रतिनिधी
शेगांव, खबरां संस्था: महाराष्ट्रांतल्या शेगांव तालुक्यांतल्या कांय गांवांत कांय दिसां पयलीं लोकांचे केंस गळटाले. आतां बोंडखेड, कालवड, कठोरा, मच्छिंद्रगड, घुई ह्या पांच गांवांनी नाखटां गळून पडपाक लागल्यांत. पंजाबच्या होशियारपूर, नवांशहर ह्या वाठारांतले जमनींत सेलेनियमचें प्रमाण चड आसा, हाका लागून हांगां पिकयिल्ल्या गवांतूय सेलेनियम चड आसता. हो गंव रेशनाचें धान्य म्हणून बुलडाणा जिल्ह्यांतल्या शेगांव म्हालांतल्या बोंडगाव सयत कांय गांवांनी वाटलो. त्या गवांच्यो चपात्यो नागरिकांनी खाल्ल्यान सेलेनियम पॉयझनिंग जालें. हाका लागून पयलीं नागरिकांचे केंस गेले आनी आतां नाखटां वचपाक सुरू जालां.
केंस आनी नाखटां वचप केन्ना थारतलें?
बुलढाणा जिल्ह्यांतल्या नागरिकांनी आतां सेलेनियम आशिल्ले गंव खावप बंद केलां. हाका लागून केस वचपाचें थारलां. जांचे केंस वचून टक्कल पडलां तांकां ३-४ सप्तकां उपरांत परत केंस येवपाक लागल्यात. नाखटां गेले उपरांत कांय दिसांनी परत नाखटां येतलीं. हे समस्येचेर कसलेच तरेच्या ट्रिटमेंटाची गरज ना. फकत नाखटां हातांनी काडचीं न्हय. इन्फेक्शन जावपाची शक्यताय आसता. डेटॉल लावपाक शकतात. नागरिकांनी भियेवचें न्हय, अशें सरकारी अधिकाऱ्यांनी केला.
संशोधन केंद्र करतलें गवांची तपासणी
शेगांवां ज्या गांवांनी केसगळती जाली थंय पंजाबांतल्यान गवांची पुरवण जाली. त्या गवांत सेलेनियम चड आशिल्ल्याचो दावो डॉ. हिंमतराव बावस्कर हांणी केला. त्या गवांचे नमुने घेतल्यात. भारतीय गंव संशोधन केंद्र (आयआयडब्यूआर) ह्या गवांत सेलेनियमची तपासणी करतलें. हे विशीं शासनाक अहवाल दितलें अशेंय संस्थानाचे निर्देशक डॉ. राम तिवारी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
