भांगरभूंय | प्रतिनिधी
कोयर एकठांय करपाचेंय शुल्क केलें उणें
भांगरभूंय I प्रतिनिधी
पणजी : पर्यटन शॅक्स धोरणाची कार्यवाही अंदूंच्या वर्सा खातीर करतना पर्यटन खात्यान शॅक्स बेड्स तशेंच कोयर एकठांय करपाचें शुल्क उणें केलां. ताका लागून शॅक्स धनयांक कांय प्रमाणांत थाकाय मेळ्ळ्या. शॅक्सा खातीर हेर शुल्क मात पयलीं सारकेंच आसा.
शॅक्स बेडा खातीर पयलीं 25 हजार रुपया वर्सुकीं शुल्क आशिल्लें. हें शुल्क आतां 15 हजार रुपयां केलां. तशेंच कोयर एकठांय करपा खातीरचें शुल्क 10 हजार आशिल्लें. हें शुल्क 5 हजार रुपयां केलां. शॅक्सा खातीर शुल्क भरपाची निमाणी तारीख 4 नोव्हेंबर आसा. 4 नोव्हेंबर मेरेन शॅक्स धनयांक शुल्क फारीक करचें पडटलें.
सरकारान 2019 वर्सा तीन हंगामा खातीर शॅक्स धोरण तयार केल्लें. 2019 ते 2022 मेरेन हें धोरण आशिल्लें. ह्या धोरणांत किरकोळ बदल करुन हें धोरण 2022 – 23 वर्सा खातीर सरकारान लागू केलां. चालू हंगामा खातीर शुल्क भरपाची निमाणी तारीख 4 ऑक्टोबर आशिल्ली. हे तारखेंत बदल करून निमाणी तारीख 4 नोव्हेंबर केल्या.
शॅक्सांचें वर्सुकीं शुल्क उणें करचें, अशी शॅक्स धनयांची मागणी आशिल्ली. पर्यटन मंत्री रोहन खंवटे हांची भेट घेवन चर्चा केल्ली. ते भायर आमदार विरेश बोरकार हांणी लेगीत हे विशीचें निवेदन पर्यटन खात्याक दिल्लें. शॅक्स धनयांच्यो कांय मागण्यो मान्य जाल्यात. 4 नोव्हेंबर मेरेन शुल्क भरपाची निमणी तारीख आसा. हाका लागून नोव्हेंबरांत दर्यादेगांचेर शॅक्स दिसपाक लागतलें.
वर्सुकीं शुल्क उणें करपाची शॅक्स धनयांची मागणी आशिल्ली. ही मागणी मात मान्य जवंक ना. ए दर्जाच्या स्ट्रेचाचेर शॅक्स उबारपाक 1 लाख 37 हजार 500 रुपया वर्सुकीं शुल्क आसा. बी दर्जाच्या स्ट्रेचाचेर शॅक्स उबारपा खातीर 1 लाख 10 हजार रुपया शुल्क आसा. हेर शॅक्सा खातीर 77 हजार रूपया वर्सुकीं शुल्क आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
