शिवोले रिक्षा, बॅटरी चोरी प्रकरणांत कावला अड्ड्याच्या धनयाक अटक

भांगरभूंय | प्रतिनिधी

4 सान पिरायेच्या तरणाट्यांक धाडून दिले सुदारघरांत

म्हापशें: मदलेभाट, शिवाले सावन सात दुचाकींच्या बॅटऱ्यां सयत टाटा सुपर एस रिक्षेच्या चोरी प्रकरणांत हणजूण पुलिसांनी अफजल अहमद शाह (गणेशनगर कोलवाळ) ह्या कावला अड्ड्याच्या धनयाक अटक केली. जाल्यार चार सान पिरायेच्या भुरग्यांक सुदारघरांत धाडून दिले. तशेंच 10 बॅटऱ्यां सयत म्हाल व्हरपी रिक्षा मेळून चार लाखांच्यो वस्तू जप्त केल्यो.

ही चोरयेची घडणूक बिरेस्तारा 26 वेर रातच्या 12.30 ते शुक्रारा सकाळीं 8.30 वरां मजगतीं घडली. कागाळदार दीपक देसाय हांणी आपली जीए 03 एएच 1923 क्रमांकाची टाटा सुपर एस ही धव्या रंगाची रिक्षा पार्क केल्ली. तशेंच थंयच जीए 03 एन 6741, जीए 03 एएच 4680, जीए 03 एन 0263, जीए 03 डब्ल्यू 0643, जीए 03 के 3343, जीए 03 के 9183, जीए 03 के 5248 ह्यो सात दुचाकी पार्क केल्ल्यो. ह्या दुचाकींच्यो बॅटऱ्यो आनी रिक्षा चोरयेक गेल्ली.

ह्या प्रकरणांत हणजूण पुलिसांनी चवकशी करून काल (मंगळारा) 16 आनी 17 वर्सां पिराये गटांतल्या चार सान पिरायेच्या दुबावीत तरणाट्यांक ताब्यांत घेतले. ह्या दुबावितांनी चोरयेची कबुली दिली आनी चोरयेच्यो बॅटऱ्याे कोलवाळ हांगासरल्या कावला अड्ड्यांत विकिल्ल्याची म्हायती दिली. दुबावितां कडल्यान चोरयेची रिक्षाय जप्त केली.

ते प्रमाण पुलिसांनी कावला अड्ड्याचेर धाड घाली आनी चोरयेच्यो बॅटऱ्याे जप्त केल्यो. पुलिसांक आनीक ती बॅटऱ्यो सांपडल्यो. ह्यो बॅटऱ्यो म्हापशें वाठारांतल्यान चोरयेक गेल्ल्यो. चोरयेची वस्तू खरेदी केल्ल्या प्रकरणांत पुलिसांनी कावला अड्ड्याचो धनी अफजल शाह हाका अटक केल्या. तशेंच चारूय सान पिरायेच्या तरणाट्यांक मेरशेच्या सुदार घरांत धाडून दिल्यात.

पुलीस निरिक्षक प्रशल नायक देसाय हांच्या मार्गदर्शना खाला उपनिरिक्षक साहील वारंग, हवालदार जयराम म्हामल, कॉन्सटेबल रूपेश आजगांवकार, अभिषेक कांसार, आदर्श नागेकर, महेंद्र मांद्रेंकार आनी कृष्णा बुगडे ह्या पंगडान ही कारवाय केली.