भांगरभूंय | प्रतिनिधी
पणजी ः शिरदोणा पोरण्यां पुलाचेर स्प्लेंडर आनी एक्टिवा मदीं जाल्ल्या अपघातांत संजना सावंत (22, शिरदोणा) हिका मरण आयलें. जाल्यार तिची भयण अक्षता सावंत आनी दुसरो दुचाकी चालक ओंकार आरोसकार जखमी जाल्यात.
अक्षता हे पिलारच्या फा. आग्नेल उच्च माध्यमीक विद्यालयात बारावी वर्गांत वाणिज्य शाखेत शिकता. आयज सकाळीं ताका विद्यालयात पावोवपाक संजना आनी अक्षता एक्टिव्ह वयल्यान वतालीं. तांची एक्टिव्ह शिरदोणाच्या पोरणें पुलाचेर पावली तेन्ना हो अपघात जालो. मुखार आयिल्ल्या स्प्लेंडर आनी एक्टिव्हाची मुखारल्यान टक्कर जाली. हातूंत संजना एक्टिव्हां वयल्यान उसळून रस्त्यार नेटान आपटलें. हांतूत ताच्या तकलेक मार बसलो आनी ताका मरण आयलें. फाटल्यान बशिल्ली ताची भयण अक्षता जखमी जाल्या.
मजगतीं, स्प्लेंडर चालक ओंकारूय जखमी जाला. दोगांचेरुय जीएमसीत उपचार सुरु आसात. ओंकार तेच शाळेंत बारावेच्या वर्गांत कला शाखेंत शिकता. तो इश्टाक घेवन येवपाक पिलार सावन शिरदोणा वतालो.
हे घडणुकेची म्हायती मेळटकच आगशी पुलीस अपघात जाल्ल्या सुवातेर पावले आनी पंचनामो केलो.
पुलीस निरिक्षक विक्रम नायक हांच्या मार्गदर्शना खाला उपनिरिक्षक नारायण पिंगे फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
