शिरगांवचें लयराई देवूळ खण लीजांतल्यान भायर काडटलें
भांगरभूंय | प्रतिनिधी
मुख्यमंत्री ः खण सुरु करपाक आडमेळीं ना हाडपाचें आवाहन
दिवचल, प्रतिनिधी ः शिरगांवचें लयराईचें देवूळ खण लीजांतल्यान भायर काडप ही आमची जापसालदारकी. देवळा वांगडाच वाठारांतली जमीनूय ह्या देवळाक दिवपाक तयार आसा. पूण खण सुरु करपाक आडमेळीं हाडूं नाकात अशें आवाहन मुख्यमंत्री डॉ. प्रमोद सावंत हांणी केलें.
बुधवारा दिवचले जाल्ल्या सनद वितरण कार्यावळींत ते उलयताले. जायतीं वर्सां बंद आशिल्ल्यो खणीं बेगीन सुरू जावच्यो हे खातीर सरकार वेगवेगळ्या तरांनी यत्न करीत आसा. अशे परिस्थितींत कोणेंच खणींक विरोध करून आडखळ हाडपाचो यत्न करचो न्हय. खणीं संबंदीं समस्या सरकारा कडेन येवन चर्चा करात. तातूंतल्यान निश्चीत उपाय मेळटलो. ते खातीर रस्त्यार येवपाची गरज ना अशें मुख्यमंत्र्यान सांगलें.
मजगतीं, मयेतल्या इव्हॅक्यू मालमत्तेंत रावपी 290 लोकांक हे कार्यावळींत मुख्यमंत्र्यान सनद वांटली. मयेंच्या सांतेरी देवळांत सनदी वाटल्यो. ह्या वेळार आमदार प्रेमेंद्र शेट, उपजिल्होधिकारी रोहन कासकार, प्रेमानंद म्हांबरे, शंकर चोडणकार, सरपंच विद्याधर करबोटकार, महेश सावंत, दिलीप शेट, मयेंचे नागरीक, भुविमोचन समिती अध्यक्ष सखाराम पेडणेंकार आनी हेर मानेस्त हाजीर आशिल्ले.
… तर घरां मोडूं शकता
मयेंच्या कस्टोडीयन मालमत्तेंत कोणे घर बांदले आनी तिसऱ्या मनशाक विकले जाल्यार फुडाराक ते घर केन्नाय मोडूंक शकता. जमीन हडप करपाचे भानगडींत कोणेंच पडचें न्हय. ही कारवाय कोणाकूच आडावंक मेळचीना. घर बांदपी, विक्रेते आनी खरेदीदारांनी हाची दखल घेवची अशेंय मुख्यमंत्री डॉ. प्रमोद सावंत हांणी स्पश्ट केलें. मयेंतल्या सरकारी जाग्यांचेर लोकां खातीर गरजेचे प्रकल्प स्थापन करतले आनी ताचो थळाव्या लोकांक फायदो जातलो अशेंय आश्वासन तांणी दिलें.
शेतकी दावे निकालांत हाडपाचो यत्न
एकाच मनशाक दोन सनद मेळच्यो नात. तशेंच जे आजूनय दावे उरल्यात ताचे खातीर कुटुंबीयांनी सहकार्य करचें. बाकीची सनद बेगीनूच पुराय करून दितले. शेतकी बाबतींत दावे निकालांत काडपा खातीर अटी उण्यो करून सगळ्यांक सुशेग दिवपाचो आमी यत्न करतले. जोड बसका घेवन हो प्रस्न सोडयतले. रानां वाठारांतल्या लोकांकूय मालकी हक्क दिवपाची प्रक्रिया चालूच आसा. हे खातीर सरकार संवेदनशील आसा अशें मुख्यमंत्र्यान म्हणलें.
जायत्यो येवजण्यो चालीक
आमदार प्रेमेंद्र शेट हांणी सरकाराच्या सहकार्यान मयेंच्या मतदार संघांत व्हड उदरगतीचीं कामां चालूच आसात. हाका जनतेनूय सहकार्य करचें. दरेक घटकाचे उदरगती खातीर आमी यत्न करतात. राज्य सरकाराचे मजतीन जायत्यो येवजण्यो चालीक लायतले, अशें तांणी स्पश्ट केलें.
येवकार शंकर चोडणकार हांणी दिलो. नारायण नार्वेंकार हांणी म्हायती दिली. सुत्रसंचालन विश्वास चोडणकार हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
