शिरगांवकार भजनी सर्तीच्या वास्को केंद्राचे सर्तीक सुरवात

भांगरभूंय | प्रतिनिधी

भांगरभूंय । प्रतिनिधी
मुरगांवः कला अकादमी आयोजीत मनोहरबुवा शिरगांवकार यादस्तीक राज्य पांवड्या वयले सर्तीच्या वास्को केंद्रा 6तले सर्तीक सुरवात जाली. वास्कोचो आमदार कृष्णा साळकार हांणी पारंपरिक दिवपी पेटोवन सर्तीचें उक्तावण केलें. शिरगांवकार भजनी सर्तींत गोंयची भजनाची परंपरा तिगोवन दवोरपाचें काम चल्लां. कला अकादमीन ही सर्त सुरू करून गोंयच्या भजनी कलाकारांक एक व्हड माची मेळोवन दिल्या अशें साळकार हांणी ह्या वेळार सांगलें.
उक्तावण कार्यावळीक कला अकादमीचो कार्यावळ उदरगत अधिकारी प्रदीप गांवकार, कार्यावळ अधिकारी संजीव झर्मेकार, दीपक नायक, परिक्षक परशुराम काणकोणकार, रामदास पिळर्णकार आनी संजीव खांडेपारकार हाजीर आशिल्ले. राज्य सरकारान कलाकारा खातीर जायत्यो येवजण्यो तयार केल्यात. ताचो फायदो कलाकारांनी घेवपाक फुडें सरचें अशें साळकार हांणी मागलें.
दादल्यांची ही भजनी सर्त पांडुरंगवाडी हांगच्या ब्रम्हस्थळ संस्थानाच्या श्री विठ्ठल रखुमाई देवस्थानाच्या सभाघरांत आयोजीत केल्या. बुधवारा सर्तीच्या पयल्या दिसा  ओम श्री विष्णू कला संस्कृतीक संस्था (नवेवाडें वास्को), जगन्नाथ स्वामी बोरीकार (तामशिरे बोरी), श्री नवदुर्गा भजन संघ (बोरी), नवसाई भजन मंडळ (शिरोडें), श्री मल्लिकार्जुन कला क्रीडा भजन मंडळ (श्रीस्थळ काणकोण), मोरुडकर भजन पथक (हेडलँड सडा, वास्को) आनी रंग अभंग (कुडचडें) ह्या पंगडांनी सादरीकरण केलें. बिरेस्तारा  28 जुलयाक श्री लक्ष्मी भजन मंडळ (रासय), श्री विठ्ठल रखुमाई भजन मंडळ (उदळशें- साकोड्डें), वैरागी कला वृक्ष (मडकय- फोंडें), शारदा संगीत विद्यालय (हेडलैंड सडा वास्को), श्री शांतादुर्गा लक्ष्मी नृसिंह साखळ्यो भजन मंडळ (सांकवाळ), श्री शिव समर्थ सांस्कृतीक मंडळ (नवेवाडे- वास्को) आनी स्वरसाधना कला व सांस्कृतीक संस्था (करंजाळ मडकय) ही भजनी पंगड सादरीकरण करतले.