भांगरभूंय | प्रतिनिधी
भिरोंडें पंचायत वाठारांत खोस; ताकतिकेन दुरुस्तीकाम पुराय
भांगरभूंय । प्रतिनिधी
वाळपयः म्हादय, पेडांनी, काराकोपरा, वांते ह्या भिरोंडे पंचायत वाठारांतल्या चार गांवांनी फाटल्या पांच दिसां सावन पियेपाच्या उदकाचो उणाव निर्माण जाल्लो. दोन दिसांनी उदका पुरवण सुरळीत जाली ना जाल्यार वाळपय उदका पुरवण कार्यालयाचेर मोर्चो व्हरपाची शिटकावणी थळाव्या लोकांनी दिल्ली. हाची दखल घेवन चार वरांनीच ह्या वाठारांतली उदका पुरवण सुरळीत जाल्या.
फाटल्या पांच दिसां सावन म्हादय, पेडांनी, काराकोपरा, वांते ह्या गांवांनी पियेवपाच्या उदकाचो खर उणाव निर्माण जाल्लो. हे संबंदांत वाळपय उदका पुरवण कार्यालया कडेन खूब खेपे कागाळी करून लेगीत ते कडेन आडनदर करताले. ताका लागून लोकांक उदका खातीर वळवळे काडचे पडटाले, हे खातीर थळावे लोक बेजार जाल्ले. दोन दिसां भितर उदक पुरवण जाग्यार पडना जाल्यार वाळपयच्या उदका पुरवण कार्यालयाचेर मोर्चो व्हरपाची शिटकावणी शेनवारा थळाव्या लोकांनी दिल्ली. हाका लागून कार्यालयाच्या अधिकारी वर्गाचेर आकांत आयलो. जंय दुरुस्ती करपाची गरज आशिल्ली ती ताकतिकेन हातांत घेतली आनी चार वरां भितर उदका पुरवण जाग्यार घातली. उदका पुरवण सुरळीत जाल्ल्यान थळाव्या लोकांनी खोस उक्तायल्या. पूण परतून ही समस्या उप्रासली जाल्यार उदका पुरवण कार्यालयाचेर मोर्चो व्हरून अधिकाऱ्यांक जाब विचारतले, अशें थळाव्या लोकांनी म्हणलां.
परतून उदकाचो उणाव जाल्यार मोर्चो निश्चीतः सरपंच
फाटल्या पांच दिसां सावन म्हादय, पेडांनी, काराकोपरा, वांते ह्या गांवांनी पियेवपाच्या उदकाचो खर उणाव निर्माण जाल्लो. अधिकाऱ्यांक फोन केल्यार लेगीत ते आडनदर करताले. हे खातीर लोकांनी कार्यालयाचेर मोर्चो व्हरपाची शिटकावणी दिल्ली. ते उपरांत फक्त चार वरांनीच उदका पुरवण जाग्यार पडली. ह्या वाठारांनी नेमान पियेवपाच्या उदकाचो खर उणाव निर्माण जाता. परतून जर असो उणाव निर्माण जालो जाल्यार कार्यालयाचेर मोर्चो व्हरपाचें थळाव्या लोकांनी निश्चीत केलां, अशें भिरोंडेंचे सरपंच उदयसिंह राणे हांणी प्रतिनिधी कडेन उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
