शिक्षण विकास कार्यावळ राबयतना ‘आरटीई’ नेम खुंटयाळाक

भांगरभूंय | प्रतिनिधी

‘कॅग’ अहवालांत सरकाराचेर बडी; मुळाव्या सुविधांचो उणाव

पणजी : केंद्र सरकाराच्या शिक्षण विकास कार्यावळीची 2015-16 ते 2019-20 ह्या काळांत गोंयांत योग्य पद्दतीन अंमलबजावणी जावंक ना. सर्व शिक्षा अभियान राबयतना शिक्षण खात्यान फुकट आनी सक्तीच्या शिक्षण कायद्यांतल्या (आरटीई) नेमांचें उल्लंघन केलां, अशी बडी म्हालेखापरिक्षकांनी (कॅग) 2022त सादर केल्ल्या अहवालांत सरकाराचेर मारल्या.
पयली ते बारावे मेरेनच्या विद्यार्थ्यांचे शिक्षणीक हीत मतींत घेवन केंद्र सरकारान सर्व शिक्षा अभियान, राष्ट्रीय माध्यमीक शिक्षा अभियान आनी शिक्षक शिक्षण ह्या येवजण्यांचो आस्पाव आशिल्ली शिक्षण विकास कार्यावळ तयार केल्ली. ह्या कार्यावळींची सगल्या राज्यांक अंमलबजावणी करपाचें निर्देश दिल्लें. ते प्रमाण गोंय सरकारान ह्या कार्यावळीची अंमलबजावणी केली. पूण तातूंत जायत्यो त्रुटी उरल्यो. हाचो परिणाम विद्यार्थ्यांच्या शिक्षणाचेर जाला, अशें ‘कॅग’ अहवालांत नमूद केलां.
सर्व शिक्षा अभियाना खाला पयली ते आठवी मेरेनच्या विद्यार्थ्यांक ‘फुकट आनी सक्तीचें शिक्षण’ ह्या कायद्या प्रमाण शिक्षण दिवप बंधनकारक आशिल्ले. पूण ‘आरटीई’ कायद्यांतल्या खाजगी विनाअनुदानीत शाळांनी अर्थीक दुर्बळ आनी वंचीत घटकां खातीर 25 टक्के सुवातो राखीव दवरपाच्या तजविजेक पाळो दिवंक ना. जायत्या सरकारी शाळांनी विद्यार्थ्यांची संख्या अदीक आसुनूय त्या शाळांनी दरेकी एकूच शिक्षक कार्यरत आशिल्लो, अशें अहवालांत नमूद केलां.

शाळा वेवस्थापन समित्यांनी शिक्षण विकास कार्यावळीची योेग्य अानी कायद्या प्रमाण अंमलबजावणी करपा कडेन आडनदर केल्या. विद्यार्थ्यांच्या येरादारी वेवस्थेचेर नियंत्रण दवरूंक ना. मुळाव्याे सुविधा उपलब्ध करूंक नात, अशेंय कॅग अहवालांत नमूद केलां.

पंचायत खात्याचो गचाळ कारभार उक्ताडार
सुमार दोन वर्सां वापराविणें पडून आशिल्ल्या जागे खातीर पंचायत खात्याक कारण नासतना 2.95 कोटींचें भाडें फारीक करचें पडलें, अशें नमूद करून ‘कॅग’ अहवालांत पंचायत खात्याचो अजागळ कारभार उक्ताडार हाडला. पंचायत खात्यान कार्यालयाच्या स्थलांतरणा खातीर भाडें तत्वाचेर जागा घेतली. पूण थंयचे फर्निशिंग विशीं वेळात निर्णय जावंक नाशिल्ल्यान ही जागा 25 म्हयने वापराविणें पडून रावली. त्या जागेचें 2.95 कोटींचे भाडें पंचायत खात्याक कारण नासतना फारीक करचें पडलें, अशें कॅग अहलांत म्हणलां.