भांगरभूंय | प्रतिनिधी
आयटी मळार बरें काम केल्ल्यांचो मुख्यमंत्र्या हस्तुकीं भोवमान
पणजी: गोंयांत आयटी पॉलिसी आनी स्टार्टअप पॉलिसी वाडची हे खातीर आयटी मळार सरकारा कडल्यान चड भर दितात. शिक्षण तशेंच आयटी मळ घटमूट करप ही सरकाराची मोख आसा अशें मुख्यमंत्री डॉ. प्रमोद सावंत हांणी सांगलें.
पर्यटन भवनांत आयटी खात्या वतीन आयोजीत केल्ले कार्यावळींत ते उलयताले. ह्या वेळार तांचे सयत आयटी मंत्री रोहन खंवटे, आयटी म्हामंडळाचे अध्यक्ष डॉ. चंद्रकांत शेट्ये आनी हेर अधिकारी हाजीर आशिल्ले. ह्या वेळार मुख्यमंत्र्या हस्तुकीं सरकारा कडल्यान 42 लाख रुपया विवीध स्टार्टअपांक धनादेश भेटयलो.
गोंयांत शिक्षण तशेंच आयटी मळ घटमूट करतात. आतां विद्यार्थीय नवे उपक्रम ह्या मळार करतात. हालींच विराज मराठे आनी जान्हवी जोशी ह्या विद्यार्थ्यांनी एक बरो उपक्रम केलो म्हूण तांचो भोवमान केलो. विद्यार्थ्यांनी, शिक्षकांनी विज्ञान मळार तशेंच आयटी मळार बरें काम करचें, सरकारा वतीन तांकां योग्य तें सहकार्य मेळटलें अशें मुख्यमंत्री डॉ. प्रमोद सावंत हांणी सांगलें.
आयटी मळार उदरगत केल्यार रोजगाराची संद तशेंच अर्थीक स्थिती वाडटा. हाका लागून आयटी मळ घटमूट करपाचेर सरकार भर दिता. खूबशा तरणाट्यांक ह्या क्षेत्रांत हाडटात. तांकां बरो पगार मेळचो हे खातीर सरकार ह्या स्टार्टअपांक अर्थीक मजत करीत आसता. आतां गोंयांतल्या खूबशा सुवातींनी वायफाय स्पॉट तयार करतले. तशेंच हर घर फायबर येवजणूय सुरू करतले अशें आयटी मंत्री रोहन खंवटे हांणी सांगलें.
ह्या वेळार मुख्यमंत्र्यां हस्तुकीं जानव्ही जोशी आनी विराज मराठे तशेंच आयटी मळार बरे काम केल्ल्यांचो भोवमान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
