भांगरभूंय | प्रतिनिधी
नवी दिल्ली, खबरां संस्था ः फाटल्या पांच वर्सां सावन शिक्षणीक रीण घेवपी भारतीय विद्यार्थ्यांचो आंकडो दुपेटीन वाडला. 2018-19 वर्सा देशांतल्या 2,68,439 विद्यार्थ्यांनी उच्च शिक्षणा खातीर रीण घेतिल्लें. हो आंकडो 2022-23 वर्सा वाडून 5,74,832 जालो. महाराष्ट्रांत फाटल्या वर्सा रीण घेवपी विद्यार्थ्यांचो आंकडो सगळ्यांत चड (78,694), जाल्यार अस्तंत बंगालांत रिणां घेवपी विद्यार्थ्यांच्या आंकड्यांत सगळ्यांत चड वाड जाल्या. थंय 2018-19 वर्सा फकत 10,650 विद्यार्थ्यांनी रीण घेतिल्लें, जाल्यार 2022-23 वर्सा हो आंकडो 38,649 जालो. परदेशांत शिकपा खातीर रीण घेवपी 45% विद्यार्थी दक्षिणेच्या 5 राज्यांतले आसात, हें विशेश.
2022-23 त वट्ट 20,450 कोटी रुपया शिक्षणीक रीण वाटलें, जें 2021-22 चे तुळेंत 20.54% चड आसा. चालू अर्थीक वर्सा बँकांनी 29,725 कोटी रुपया वाटले. उद्दिश्ठां मदले 18,083 कोटी रुपया ऑक्टोबर 2023 मेरेन जारी केले. विशेश म्हळ्यार 83% हीं रिणां सरकारी बँकांनी दिलीं.
इंडियन बँक असो.च्या अहवाला प्रमाण, हिंदी उलोवपी राज्यांत शिक्षणीक रिणाचें प्रमाण खुबूच उणें आसा. युपी, बिहार, मध्य प्रदेश आनी राजस्थान ह्या चार हिंदी भाशीक राज्यांतल्यान रीण घेवन परदेशांत गेल्ल्या विद्यार्थ्यांचो आंकडो एकट्या केरळांतल्या विद्यार्थ्यां इतलो आसा.
रीण घेवपी विद्यार्थी
महाराष्ट्र 78,694, केरळ 66,589, तमिळनाडू 60,550, कर्नाटक 53,486, आंध्र प्रदेश 46,715
तेलंगणा 30,508, युपी 30,446 मध्य प्रदेश 19,078,राजस्थान 11,595, बिहार 10,542
देश 5,74,832
उच्च शिक्षणा खातीर 7.5 लाख रुपयांच्या रिणा खातीर गॅरंटराची गरज ना, कांयच दवरचें पडना. परदेशांत वचपी 40% विद्यार्थी रीण घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
