भांगरभूंय | प्रतिनिधी
गोंय म्हळ्ळ्यार पर्यटन, गोंयचें पर्यटन म्हळ्ळ्यार ओल्ड गोवा, दर्यादेगो हीच रुपां देस- विदेसा मुखार गेल्लीं, आयजूय वतात. तातूंत बदल हाडपाचे येत्न आदले मुख्यमंत्री मनोहर पर्रीकर हांणी केले ते तांच्या कर्तुपांतल्यान. संरक्षणमंत्रीपद थोडोच तेंप सांबाळटना आपलें बुदवंतपण, शिक्षणीक कुशळतायेंतल्यान संरक्षण खात्यांत तांणी जो वावर केल्लो तो फळादिक जाता, हें आतां दिसपाक लागलां. शस्त्रां आमच्या देसांतय तयार जावपाक लागल्यांत, झुजा खातीर देस सिद्ध आसा, हें प्रधानमंत्री नरेंद्र मोदीजी समर्थपणान सांगूंक शकतात.
गोंयचे मुख्यमंत्री म्हणून पर्रीकार हांच्या बुन्यादी वावराचो अभ्यास केल्यार ते फुडाराचे चिंतपी आशिल्ले हें होलमता. मुखेल करून तांणी शिक्षणीक, साधनसामग्रेची बांदावळ, भलायकी, नागरी सुविधांचे, समाजिक सुरक्षा येवजणींचे निर्मणे खातीर तशेंच राज्याच्या पुलीस खात्यांत बदलाचीं ल्हारां हाडपा पासत केल्लें कामकाज उंचेल्या पावंड्याचें. अधिकाऱ्यांचेर निंबून रावचे परस खात्यांत कामकाजांत आशिल्ल्या ल्हानात ल्हान कर्मचाऱ्यांनी, सेवेंतल्यान निवृत्त जाल्ल्यांनी, बुद्धिमान गोंयकारांनी तांकां सुचोवण्यो केल्यार ते आयकताले, अभ्यास करून येवजणींची मांडणी करताले. कायद्याचें मुळावें गिन्यान कायद्याचीं पुस्तकां वाचून मेळ्ळें तरी कायदेतज्ञांकडे भासाभास करून तांणी पावलां घाल्यांत. तांणीच न्हय खंयच्याय आदल्या सरकाराच्या येवजणी, बुन्यादीच्या वावराचो नियाळ करप गरजेचें.
शिक्षण, भौशीक सुविधांचे बांदावळींत बदल हाडटना सरकारान आदले मुख्यमंत्री प्रतापसिंह राणे, लक्ष्मीकांत पार्सेकार, आमदार दिगंबर कामत हांकांय विश्वासांत घेवन तांचे कडेन भासाभास केल्यार सरकाराचे बरेच प्रस्न सुटावे जातले. राज्यांतल्या शिक्षण, बांदावळ क्षेत्रांतल्या जाणकारांचे, तज्ञांचे विचार आयकून घेतल्यार सरकाराक लाव जातलो. मुखेलमंत्री डाॅ. प्रमोद सावंत फाटल्या अणभवान शिकल्यात, विचारवंतां कडेन भासाभासेची संद मेळत तेन्ना घेतात, अशी तांची चाल-चलणूक सांगता, पूण प्रशासकीय आडमेळीं पयस करपाक फाव तें येस तांका मेळूंक ना. आडमेळ्यांतल्यान फुडारा कडेन पळयतना, पावल घालतना तांचो आत्मविश्वास, राजकी इत्साशक्त वाडटा. उलयतनाय ते जतनाय घेतात, तातूंतल्यान तांकां गोंय 100 टक्के स्वयंपूर्ण करपाचो मार्ग दिसतलो, अशी आशा आसा. ताणीं आपल्या मंत्रीमंडळांतल्या वांगड्यां कडेन, प्रदेस भाजपच्या मुखेल पदाधिकाऱ्यां कडेन जावपी भासाभासेक म्हत्त्व दिल्यार तांचें गिन्यान वाडटलें. म्हत्त्वाचे निर्णय घेतना, ते विशींची घोशणा करतना मंत्र्यांनी मुख्यमंत्र्यां कडेन पयलीं उलयल्यार सरकारांतली किजिलां, तंटे उणे जातले. सरकार ही नित्याची, फुडारा कडेन पळोवपाची प्रक्रिया आसपाची, सकारात्मकता ते प्रक्रियेंतल्यान दिसपाची गरज आसा.
नव्या शिक्षण धोरणाचे बांदावळीचो आरंभ मनोहरबाब केंद्रीय मंत्री आसतनाच जाल्लो, शिक्षण हक्क कायद्याची जोड ह्या धोरणाक आसा. पर्रीकर, पार्सेकरबाब हांकां शिक्षण क्षेत्रात येवपी बदलांची म्हायती कुशळताय विकासांतल्यान मेळिल्ली आनी तेन्नाच बालवर्ग, शिकवण्यो, देणग्यो घेवपा विशींची नेमावळ गोंयांत तयार जाल्या. भारतीय भाशा सुरक्षा मंचाच्या मागणे वेल्यान नेमिल्ले सरकारी समितीच्या अहवालांत नवें धोरण चालीक लावपा विशीं, प्रादेशिक भासांतल्यो शाळा बंद पडटात ती म्हायती आसतली, उपरांत फुडल्या वावरा विशीं सुचोवण्यो शिंपणावळ मंत्री सुभाष शिरोडकार, पार्सेकरबाबांचे फुडारपणा खाला नेमणूक केल्ल्या समित्यांनी केल्या आसतल्यो.
शिक्षणात बदल हाडटना ८ वी, १० वी, १२ वे उपरांतच्या शिक्षणाचो नियाळ समितीन केला जाल्यार ताचो सरकारान बारीकसाणेन बेगीन अभ्यास करचो, बदलांची म्हायती पालकांक दिवची. म्हत्त्वाचे बदल कुशळताय, वेवसाय शिक्षणांत जातले, पदवी मेरेनचे शिक्षण घेवपाची तजवीज जातली, शिक्षणात भाशा शिक्षणाक म्हत्त्व येतलें. कुशळताय अभ्यासक्रमाचें विद्यापीठ हाडपाची तयारी करतना तें स्वतंत्र, केंद्र सरकाराची मान्यताय मेळिल्लें आसचें. गोंयांत फकत खेळांचे शिक्षण विद्यापीठा मेरेन शिस्तीन पावल्यार उत्तर, पूर्वे कडल्या राज्यांवरी खेळगडे, प्रशिक्षकय मेळटले.
हालींच विधानसभेंत भुरग्यां खातीर स्टेडियम उगते करपाक सरकारान करूंक नाशिल्ल्या वावरा विशीं आमदारांनी खंत उक्तायली. खेळामंत्र्यांचें क्रीडा शिक्षण दिवपी विद्यापीठ हाडपाचें सपन आसा, तांच्या येत्नांक बळगें मेळटलें जाल्यार कुशळताय शिक्षणांत खेळाचो आसपाव करून घेवचो. दोन वर्सांनी खेळा विद्यापीठ धोरण आपसूक चालीक लागतलें. ‘खेलो इंडिया’क गोंयांत येवकार दितना तातूंत गोंयकारांकय सुवात मेळपाक जाय. खेळांत, शारिरीक शिक्षणात गोंयां भायर वचून शिक्षण घेतिल्ले शिक्षक आसतलेच. तांच्या विचारांतल्यान खेळांमंत्री फुडें वचत व्हय? गोंयच्या तलाशा प्रभून भांगर जोडलें, उपरांत संजना प्रभुगावकर, नित्या हळर्णकार, गुंजल चोपडेंकार हांणी मेळयिल्ल्या जैता खातीर तांच्या आवय- बापायन त्रास काडल्यात. फुटबाॅल, क्रिकेटच न्हय जाल्यार कबड्डीवरी खेळांक, अॅथलेटिक्साक आंतरराष्ट्रीय पावंड्यार म्हत्त्व आयलां, पूण गोंयच्या पंगडांक गोंयां भायल्यांक घेवन खेळचें पडटा तें कित्याक हाचो विचार जावचोच.
शास्त्रीय संगीत, नाटक, वाद्यांचे शिक्षण हो विशय कुशळताय शिक्षणात आसपावपाखातीर अभ्यास जावचो. विद्यार्थ्यांच्या शारिरीक, बौद्धिक, मानसिक बळग्या खातीर खेळ, गायन, वाद्य शिक्षण एक म्हत्त्वाचो पावंडो. बारावी मेरेनचें शिक्षण विद्यार्थ्यांक देणगे बगर मेळप तांचो हक्क असें समजूनच फुडाराची येवजण करची.
साधनसुविधांचे बांदावळीचें आव्हान सरकारा मुखार आसा, नवे बुन्यादी फातर घालचे आदीं हातांत घेतिल्लीं विकासकामां पुराय करपाची सरकाराची मोख आसा. नव्यो सरकारी बिल्डिंगो बांदचे परस आशिल्ल्या बिल्डिंगेचें आॅडिट जावचें, सैम सांबाळून आनी प्रादेशिक आराखडो झुजा पावंड्यार घडोवन बांदावळीकय नवी दिका दिवची. कोविडाच्या उपरांत वातावरणात जे बदल खिणाखिणांक जातात, तांच्या अभ्यासांतल्यानच साधनसुविधांची बांदावळ करची, ना जाल्यार आयज बांदलें, फाल्यां तुटलें, फुटलें अशी अवस्था जातली, काल डांबर घाल्ल्या रस्त्यांक दुसरे दिसा फोंडकुलां पडटात तशीच. रस्त्यावेल्या फोंडकुलांचेर उपाय काडपा खातीर भौशीक बांदकाममंत्री खात्याच्या ज्युनियर, सिनियर इंजिनियरां कडेन उलयत व्हय? फोंडकुलांच्यो अजापाच्यो काणयो तांकां आयकूंक मेळटल्यो.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
