भांगरभूंय | प्रतिनिधी
आयज शिक्षक दीस, ते निमतान ताची म्हानताय सांगपी विशेश लेख
दरवर्सा 5 सप्टेंबर हो दीस शिक्षक दीस म्हूण व्हडा दबाज्यान मनयतात. हो दीस जावन आसा डॉ. सर्वेपल्ली राधाकृष्णन हांचो जल्मदीस. विद्यार्थ्यांच्या जिणेंत ज्ञानाच्या उजवाडाचो दिवो पेटोवपी म्हळ्यार शिक्षक. अंधार पयसावन ताका उजवाडा कडेन हाडपी म्हळ्यार शिक्षक. प्राचीन काळांत गुरु आसताले. आयज शिक्षक आसात. दोगांयचीय कामां तींच, पूण नावां वेगळी. आपल्या विद्यार्थ्यांच्या जिवीतान ज्ञानाची ज्योत पेटोवप हें शिक्षकाचें परम कर्तव्य.
कशे तरी भुरग्यां मेरेन शिक्षण पावोवंक जाय ह्या खातीर शिक्षकाची तडजोड, धडपड, ताची घालमेल सदांच आसता. आयची शिक्षण पद्धती पयलींच्या पेक्षा खूप वेगळी आसा. कोरोना महामारीच्या काळांत शिक्षकान स्वतःक नव्यान घडयलो, रचयलो आनी येणाऱ्या अपसरणाक तोंड दीत तो स्वतःक सिद्द करीत गेलो. झूजलो पूण डगमगलो ना.
गुरुक परब्रह्म अशें म्हणलां. गुरु म्हळ्यार शिक्षक तो ईश्वरा सारको. जसो ईश्वर वा देव आमकां घडयता आमकां रूप, रंग, शरीर आनी खूप किदें दिवन एक नवो जल्म दिता तशेंच तरेन एक शिक्षक आपल्या विद्यार्थ्याक घडयता. विद्यार्थ्यां मदीं ज्ञानाचें बीं रुजोवन ताचें रुख जायसर तो झटत आसता. आपल्या विद्यार्थ्यांक तो सर्वगूण संपूर्ण करता. विद्यार्थ्यांची बौद्धीक क्षमता वाडयता. शिक्षक हो सर्वेश्वर आसा. तो ज्ञानाचो धनी, ज्ञानाचो कुबेर म्हणू येता.
शिक्षण ही शिक्षका कडेन आशिल्ली एक व्हडली संपत. आनी ती संपत सगळ्यांक वाटपाचें कार्य तो सतत करीत आसता. जितलें ज्ञान तो वाटटा तितलेच तें वाडटा. शिक्षक एक बरो नागरीक घडयता. आपल्या विद्यार्थ्याक अज्ञानाच्या काळखांतल्यान उजवाडाच्या ज्ञाना कडेन तो पावयता. ज्ञानाचो उजवाड पातळावन दर विद्यार्थ्याचो जल्म धन्य करता तो शिक्षक. हें सगळें तो निस्वार्थपणान करता. केन्नाच कसलीच फळाची अपेक्षा करीनासतना तो भरभरून दिता. विध्यार्थ्यां कडल्यान कसल्याच उपकाराची परतफेड जातली वा जावंक जाय हाची अपेक्षा तो केन्नाच करीना. जसो सूर्य धाय दिकांनी उजवाड भरता तसोच एक शिक्षक आपल्या विदयार्थ्यांच्या जीवितान अखंड अशी ज्ञानाची केन्नाचं न पालोवपी अशी ज्योत तो पेटयता.
दर एका शिक्षकाचें सपन आसता आपल्या विद्यार्थ्यांन आपल्या परस व्हड जावचो. ताका नांव लौकिक मेळचें. संवसारांत ताचें नांव जावचें तेंय बी सदगुणांक लागून. दुर्गुणांक लागून न्ही. एक बरो नागरीक घडचो. शिकोवप हें सादें काम न्हय आनी तातूंत चड धीर आनी पासीयेंस जाय पडटा. दर एका वर्गांतल्या वेगवेगळ्या प्रकारच्या विद्यार्थ्यांक शिक्षक हाताळटात तरी दरेका विद्यार्थ्याक एकूच वागणूक दिवपाक आनी तांकां स्वताची बरी जीण करपाची प्रेरणा दिवपाक ते केन्नाच कमी पडनात. कसलोच भेदभाव करीनासतना ते दर ऐकल्याक शिकयता. हें सगळे जो करता तो खरो शिक्षक. शिक्षक म्हूण जो मान मेळटा तो घडये आनी कोण जावन मेळत. तुमचें कार्य अशेंच चालू दवरात. दर एका शिक्षकाक शिक्षक दीसाची मना काळजा सावन परबी.
–
तूं एक शिक्षक
हे शिक्षका
तूंच परब्रह्म, तूंच ईश्वर
दर विद्यार्थ्याक, तूंच सर्वेश्वर
ज्ञानाची पेटोवन ज्योत
भरता उजवाड जिणेंत
शेणिल्ल्याक हाडटा मार्गार
नवीन दर घडणुकेंत
गणपती घडयलो जसो मूर्तीकारान
तसोच घडयलो तुंवें विद्यार्थ्याक
पालकां फाटल्यान तूंच आसता
विकासाक ताच्या हातभार लायता
दर ऐकल्याक शिकयता
बरो नागरीक घडयता
ज्ञानाचो जावन कुबेर
भांगर शिक्षणाचें पसरायता
शिकता नवीन तुजेच खातीर
आनी तुकाच नवीन शिकयता
नव्या युगान नवीन आपणावंक
ही शिकवण तुका शिकयता
चुकलो जाल्यार लायता सुदारुंक
लायता संस्कार तुका स्वीकारुंक
जाणट्यांचो आदर करुंक
शिक्षक फुडें तुका साक्षर करुंक
व्हड तुमी जातात तेन्ना
आपल्या गुरुंक केन्नाच विसरू नाकात
ज्ञान तुमकां जाणे दिलां
ताका केन्नाच दुखोव नाकात
तूं जाला शिक्षक हें
भाग्य म्हण तुजें
नवीन नवीन शिकपाचें देणे
पदरान पडला रे तुजें
भलायकी मेळची
मेळचें नांव लौकिक
इतलेंच मागणे म्हजें
भेटयता परबी हे शिक्षका तुका
शिक्षक दीसाचें हें कवित म्हजें
पवित्र नातें राखचें तुंवे
विद्यार्थ्याचें आनी तुजें
अभिमान आसचो तुका शिक्षणाचो
शिक्षणाच्या दर्यांत ह्या
व्हडें सुखान पेलोवन व्हर तुजें
(लेखिका एक शिक्षिका जावन आसात.)
शिल्पा लाड
8411007204
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
