भांगरभूंय | प्रतिनिधी
हेरा वयलो राग शिक्षकांनी काढलाे विद्यार्थ्याचेर : मुख्यमंत्रीपणजी : शिक्षकां कडल्यान विद्यार्थ्यांक मारपेट जावपाचें प्रकार वाडत आसात. शिक्षकां कडल्यान विद्यार्थ्यांक जावपी मारपेटी फाटल्या कारणांचो अभ्यास करतले. फुडारांत अशो मारपेटीच्यो घडणुको टाळपाक शिक्षकांक समुपदेशन दिवपाची गरज आसा, अशें मुख्यमंत्री डॉ. प्रमोद सावंत हांणी म्हणलें.
हेर कोणा वयली तिडक शिक्षकांनी विद्यार्थ्यांचेर काडपाक जाय, असो दुबाव मुख्यमंत्र्यांनी पुराय प्रकरणाच्या चवकशीचें आस्वासन दितना उक्तायल्या.
कामुर्ली मुळाव्या शाळेंतल्या विद्यार्थ्याक मारपेट करपी शिक्षिकेक पयलीं निलंबीत करून नेमा प्रमाण तांचेर कारवाय जातली. भारतीय न्याय संहितेतल्या कलमा प्रमाण पुलीस तपास करून कारवाय करतले, जाल्यार शिक्षण खातें पयलीं निलंबीत करून फुडली चवकशी सुरू करतले, अशें मुख्यमंत्र्यांनी सांगलें.
पुस्तकाची पानां पिंजिल्ल्याच्या कारणा वयल्यान 4थेंत शिकपी विद्यार्थ्यांक दोगां शिक्षिकां कडल्यान मारपेट जाली. हे विशींची कागाळ कोलवाळ पुलिशेंत दाखल जाल्या. ताचेर उलयतना मुख्यमंत्री डॉ. प्रमोद सावंत हांणी म्हणलें, विद्यार्थ्याक मारपेट करपाचो प्रकार गंभीर स्वरुपाचो आसा. हेर कोणा वयलो राग शिक्षिकेन विद्यार्थ्यांचेर काडपाक जाय, असो दुबाव आसा. अशें प्रकार घडपाचे वाडत आसात.
हालीच्या काळांत विद्यार्थ्यांक शिक्षकांनी मारपेट करपाच्यो तीन घडणुको घडल्यो. हे विशीं शिक्षकांचे समुपदेशन करपाची गरज आसा. शिक्षण सचिवां कडेन हे विशीं आपूण चर्चा केल्या. मारपेटीचे प्रकार कित्याक घडटात, हाचोय अभ्यास जावपाक जाय.
विद्यार्थ्याक मारपेट केल्ल्यान पुलीस कलमा प्रमाण तपास करून कारवाय करतले. तशेंच शिक्षण खातेंय शिक्षिकांचे निलंबन करून चवकशी करतले. पुलीस तशेंच शिक्षण खात्या कडल्यान कारवाय जातली, अशें मुख्यमंत्री डॉ. प्रमोद सावंत हांणी सांगलें.
—————————
कामुर्ली विद्यार्थ्यांक मारपेट प्रकरणांत शिक्षिका निलंबीत
– शाळा वेवस्थापनान जारी केल्लो आदेश
म्हापशेंः वागाळी-कामुर्लेच्या श्री सरस्वती मंदिर मुळाव्या शाळेच्या चवथ्या वर्गांत शिकपी णव वर्सां पिरायेच्या विद्यार्थ्याक मारपेट केल्ल्यान सुजल गावडे (वेरें) आनी कनिषा गडेकार (पिर्ण) ह्या दोगांय शिक्षिकांक सेवेंतल्यान निलंबीत केल्यात. संबंदीत शाळा वेवस्थापनान निलंबनाचो आदेश जारी करून शिक्षण खात्याक हे विशीं म्हायती दिल्या.
ह्या प्रकरणांत मंगळारा कोलवाळ पुलिसांनी दुबावीत शिक्षकां आड भारतीय दंड संहितेच्या कलम 118 (1), 126 (2), 351 (2) आनी 3 (5) आनी गोंय बाल कायदो कलम 8 खाला गुन्यांव नोंद केलो. तशेंच दुबावितांक चवकशी खातीर पुलीस स्टेशनांत हजर रावपाची नोटीस धाडिल्ली.
ह्या एकंदर प्रकरणाची दखल घेवन शाळा वेवस्थापनान बुधवारा सकाळीं दोनूय दुबावीत शिक्षिकांक सेवेंतल्यान निलंबीत करपाचो आदेश जारी केलो. ह्या आदेशाची म्हायती वेवस्थापनान शिक्षण खात्याक दिली. ते प्रमाण फुडल्या सप्तकांत दुबावीत शिक्षिकांची चवकशी शिक्षण संचालका मुखार जातली.
ताचे आदीं मंगळारा सांजवेळार कोलवाळ पुलिसांनी गुन्यांव नोंद केल्ल्याची म्हायती उजवाडाक आयली तेन्ना शाळा वेवस्थापनान पुलीस स्टेशनांत निरिक्षक विजय राणे हांकां मेळून पुराय प्रकरणाची चवकशी केल्ली.
मजगतीं, पुलिसांनी जारी केल्ल्या नोटिसे उपरांत दुबावीत शिक्षिकां बुधवारा 4 तारखेक सकाळीं 10.30 वरांचेर कोलवाळ पुलीस स्टेशनांत हाजीर जाली. ताणें तपास अधिकाऱ्यां मुखार आपलें स्पश्टीकरण दिलें.
———-
कामुर्लीं एका विद्यार्थ्याक मारपेट जाल्ल्यान शाळा वेवस्थापनान दोगां शिक्षिकांक निलंबीत केल्यात. ही म्हायती आमकां संबंदीत वेवस्थापनांतल्यान मेळ्ळ्या. नेमा प्रमाण ह्या निलंबीत शिक्षिकांची सुनावणी 15 दिसां भितर जातली. ते उपरांत निलंबनाच्या आदेशाचेर फुडलो निर्णय जातलो.
– शैलेश झिंगडे, शिक्षण संचालक
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
