भांगरभूंय | प्रतिनिधी
खंयच्याय सरकारी निर्णयाक विरोध करुंकूच जाय असो आमचो समज जावन पडला आसूंक जाय. खंयचोय निर्णय मागीर तो बरो आसूं वा वायट, विरोध जावंकूच जाय. तसो विरोध जावप हीं समाज जागो आशिल्ल्याचीं लक्षणां. बर्याची गजाल ती. पूण, खंयचे गजालीक विरोध करचो हाका कितें भान आसूंक जाय न्ही. उठसूठ दर एके गजालीक विरोध करप म्हणल्यार कितें? तर सद्याक सरकारी मुळाव्या शाळांचेर वाद उप्रासला. उणे विद्यार्थी आनी एक शिक्षक आशिल्ल्यो शाळो लागसरच्या शाळांनी विलीन करपाचो सरकारान निर्णय घेतला आनी ताका कांय लोकांनी विरोध करूंक सुरवात केल्या. विरोध करतल्यांक हें शाळांचें विलिनीकरण नाका.
गोंयच्या पयल्या सरकारान गोंयच्या भुरग्यांनी साक्षर जावचें म्हणून गांवांगांवांनी शाळा उबारल्यो. शिकोवंक गोंयांत कोण ना म्हणून शेजारच्या राज्यांतले मास्तर हाडले. ह्यो शाळा तेन्ना कोणाच्या तरी पडवेर वा भाड्याच्या घरांनी भरताल्यो. आमचे वेळार तर शाळांनी बांक लेगीत नासले. जमनीर साक घालून बसताले आनी शिकताले. एकूच मास्तर चार वर्ग शिकयतालो. उपरांत सरकारान गांवांत जमनी घेवन बर्यो व्हडल्यो गडगंज अश्यो शाळा उबारल्यो. आज शाळा आसात, पूण भुरगीं ना, अशी परिस्थिती. कोण जापसालदार हाका? आमीच न्ही? जे कोण आज सरकारी निर्णयाक विरोध करतात ताणीं हाचो विचार केला?
आमकां गृह आधार, कन्यादान, जाण्ट्यांक आधार सारक्यो सरकारी सवलती जाय. सरकारी रेशन दुकानां वेलें फुकें सवाय रेशन घेवंक आमी फाटीं नात. ते खातीर आमी फटीचे दुकुमेंत दिवन रेशन कार्डांय करपाक फाटीं नात. सरकारी नोकरी नाका म्हणपी तर कोणूच मेळचो ना. ते खातीर हाका ताका धरून लाखांनी रुपया मोडपाची आमची तयारी. पूण, सरकारी शाळा मात कोणाकूच नाका. सरकारी शाळांनी नोकरी करप्यांक वा शिक्षक म्हणून वावुरप्यांकूय नाका. सगळेच आपणाल्या भुरग्यांक खाजगी शाळांनी हजारांनी रुपया फी भरून घालूंक तयार. मागीर ह्यो सरकारी शाळा कोणाक?
कांय पालक तर पयसुल्ल्या शाळांनी भुरग्यांक घालतात. तांकां हाडून पायतात. परत व्हरूंक येतात. सकाळीं आनी दनपरां रस्त्यांवेली गच्चमुड्डी पळेल्यार कळटा. शेजरा आशिल्ली शाळा नाका आसता हांकां. कारण ती सरकारी. आनी पयसुल्ली खाजगी शाळा परवडटा. गाडयेचो खर्च आनी आपणालो वेळ पिड्ड्यार करपाची तांची तयारी. पूण सरकारी शाळांचे विलिनीकरण जावन मात्शें पयस वचचें पडल्यार हांचेर आकांत येता. पूण त्यो शाळा तिगोवचे खातीर आपणेंय कितेंतरी करूंक जाय हाचो विचार आमकां करूंक नाका.
हांव रावतां त्या दवर्ल्ले गावांत म्हज्या घराच्या दोन वाटांनी दोन सरकारी शाळा आसात. लागींच कांय खाजगी शाळाय आसात. ह्या शाळांनी वचपी भुरगीं हांव घरांत रावन पळेतां. कोणालीं भुरगीं सरकारी शाळांनी वतात आनी कोणालीं खाजगी तें दिसता. सरकारी शाळांनी वचपी भुरगीं खंयची? जांकां आमी भायले म्हणून हिणसायतात, जे लोक कामा निमतान हांगा राबितो करून आसात त्या लोकांची भुरगीं. सरकारी शाळांनी भुरग्यांक धाडटकूच त्या भुरग्या फाटल्यान दर म्हयन्याक पयशे मेळटात म्हणून ते सरकारी शाळांनी भुरग्यांक धाडटात. कांय तेंपान तेय गोंयकार जातले आनी आपणाल्या भुरग्यांक खाजगी हायफाय शाळांनी धाडटले हातूंत दुबाव ना.
हांव सदांच म्हणटां, आमचो फुडार हांगा दिसता. गोंय मुखार कोणा हातांत वचपाचें तें कळटा. आमचीं भुरगीं चार अक्षरां इंग्लीश शिकून युरोपाक वतलीं आनी आमचें गोंय ह्याच लोकांच्या हातांत वतलें. सरकारी नोकर्यांक लागपी कोंकणी हींच भुरगीं शिकतात म्हणटकूच नोकर्यो ह्याच भुरग्यांक मेळपाच्यो. कांय तेंपान सरकारूय हांच्याच हातांत वतलें. आमी ‘पोगो, पोगो’ करीत उरतले पूण आमच्या भुरग्यांक कोंकणी येवची ना हें सत. हाचो फायदो ह्या लोकांक जातलो.
आमी कोणाक दोश दिवपाचो? चूक आमचीच न्ही? आमी आमच्या भुरग्यांक खाजगी शाळांनी शिकोवंक घालतले. आपली भास सोडून फिरंगी भाशेंत शिकप घेतले आनी सरकारी शाळांनी भुरगीं ना म्हणून सरकार तांचें विलिनीकरण करता आसत तर ताकाय विरोध करतले? खरें तर सरकारान शाळांचें विलिनीकरण करिनासतना ह्यो शाळाच बंद करपाच्यो. जे विरोध करतात ताणीं आपणालीं भुरगीं ह्या सरकारी शाळांनी धाडचीं. शेजार्यांकूय धाडूंक सांगचीं. जे शाळेंत उणेच पन्नास भुरगे आसचे ना त्यो शाळा बंद करपाचो सरकारान निर्णय घेवचो. आमी आमच्या भुरग्यांक ह्या शाळांनी धाडचे नात आनी शाळा बंद करुंकूय दिवचे नात हें कशें? शाळा फकत शिक्षकांचो संवसार चलोवंक न्ही तर भुरग्यांच्या फुडारा खातीर आसूंक जाय. आमकां जर आमच्या भुरग्यांचो फुडार खाजगी शाळांनी बरो घडटलो अशें दिसता जाल्यार सरकारी शाळा जायच कित्याक? सरकारी तिजोरी रिकामी करूंक आनीकूय वाटो आसात.
सरकारान कोणतरी विरोध करता म्हणून एकदां घेतिल्लो निर्णय फिरावचो न्ही. ह्या निर्णयाक लागून कांय शाळा तरी वांचतल्यो. सरकारी शाळांनी शिकप्यांचें कल्याण जातलें. शाळां खातीर सरकारान बालरथांचें प्रयोजन केल्लें आसाच, म्हणटकूच कोणाकूच त्रास जावपाची शक्यता दिसना. जंय बालरथ ना थंय सरकारान ती तजवीज करची. इतलेंय आसून जर कोणूय विरोध करताच आसत तर तांकां सरळ सांगचें, बंद जावपी शाळा तुमी घेयात आनी चलयात. पळोवया कोण मुखार येता जाल्यार. फकत विरोधा खातीर विरोध नाका. मुखार सरात आनी शाळा हातांत घेयात. बरे तरेन चलयात. शाळा बरी चलयल्यार भुरगीं आपूण जावन ते शाळेंत येतलीं. आनी जमलेंच जाल्यार सरकारान कोंकणी भाशा मंडळा सारक्या संस्थां कडेन ह्यो शाळा सोपोवच्यो.-
अभयकुमार वेलिंगकार
9923442746
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
