भांगरभूंय | प्रतिनिधी
पणजीः सरकारी मुळाव्या शाळांच्या विलिनीकरणाचो निर्णय घेवन गोंयचे पयले मुख्यमंत्री भाऊसायब बांदोडकार हांचें दायज नश्ट करपाचो यत्न सरकार करता. इतलो व्हड निर्णय घेतना मुख्यमंत्री डॉ. प्रमोद सावंत हांणी कोणाकूच विस्वासांत घेनात, चर्चा करिनात, ही शोकांतिका आसा अशें गोवा फॉरवर्डाचे आमदार विजय सरदेसाय हांणी सांगलें.
सरदेसाय हांणी सांगलें, शिक्षणाची गंगा गोरगरिबांच्या दारा मेरेन व्हरचे खातीर भाऊसायब बांदोडकार हांणी गांवागांवांत सरकारी मुळाव्यो शाळा सुरू केल्ल्यो. तातूंतल्या खूबशा शाळांचें एकामेकां मदीं विलिनीकरण करून भाऊसायबांचे विचार आनी दायजूच काबार करपाचें कारस्थान भाजपा सरकारान रचलां. शाळांचें विलिनीकरण हो गांवगिऱ्या वाठारांतले विद्यार्थी, पालकांचे नदरेन सामके संवेदनशील विशय आसा. ताका लागून असो निर्णय घेवचे आदीं सरकारान पालक, शिक्षणतज्ञां कडेन चर्चा करप आनी ते उपरांत विधानसभा अधिवेशनांत हो विशय चर्चेक घेवप गरजेचें आशिल्लें. पूण तशेंच कांयच करिनासतना मुख्यमंत्र्यान आपले मर्जे प्रमाण शाळांचें विलिनीकरण करपाचो निर्णय घेतला. तातूंत पालक, विद्यार्थ्यांच्या फुडाराचो कसलोच विचार केल्लो ना, अशें सरदेसाय हांणी म्हणलें. मजगतीं, राज्यांतल्या सुमार 294 सरकारी मुळाव्या शाळांच्या विलिनीकरण संबंदांत फुडल्या दोन- ती दिसांनी मुख्यमंत्री डॉ. प्रमोद सावंत सरकाराचो निर्णय जाहीर करपाची शक्यताय आसा.
अजून कसलेंच स्पश्टीकरण ना
सरकारी मुळाव्या शाळांचें विलिनीकरण जाले उपरांत विद्यार्थी, पालकांक ताचो कशे तरेन फायदो जातलो, विद्यार्थ्यांक कसल्यो सेवा सुविधा मेळटल्यो, विलीन जावपी शाळांतले शिक्षक, मुख्याध्यापकांचें कितें जातलें, अशा म्हत्वांच्या गजालींचेर मुख्यमंत्री डॉ. प्रमोद सावंत हांणी कसलेंच स्पश्टीकरण दिवंक ना. हें स्पश्टीकरण मेळ्ळे उपरांत गोवा फॉरवर्ड हे संबंदांत फुडलें धोरण थारायतलो, अशें आमदार विजय सरदेसाय हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
