भांगरभूंय | प्रतिनिधी
शिक्षण निरिक्षकांक पालकांची समजूत घालपाक अपेस
भांगरभूंय I प्रतिनिधी
पणजी : गोंयांतल्याे एक शिक्षकी शाळा, एकूय विद्यार्थी नाशिल्ल्या तशेंच 10 परस उणी विद्यार्थी संख्या आशिल्ल्या सरकारी मुळाव्या शाळांचे लागसारच्या शाळांनी विलिनीकरण करपाचो निर्णय सरकारान घेतला. पूण ह्या निर्णयाक पालकांनी विरोध करपाक सुरवात केल्या. शिक्षकांनी पालकां कडेन बसका घेतल्यो. पूण ते उपरांतूय पालकांनी सरकाराच्या ह्या निर्णयाक तेंको दिवपा बदला विरोधच करपाक सुरवात केल्या. ताका लागून पालकांची समजूत काडपाक शिक्षण खात्याक अपेस आयिल्ल्याचे दिसून येता.
फाटल्या कांय वर्सां पसून सरकारी मुळाव्यो शाळा बंद पडत आसात. जायत्या शाळांनी पाच ते धा विद्यार्थी आसतात. कांय शाळांनी फक्त एकूच शिक्षक कार्यरत आसात. विद्यार्थ्यांक गरजेच्यो सेवा-सुविधा ह्या शाळांनी उपलब्ध नासतात. ताका लागून भोवतेक पालक आपल्या भुरग्यांक सरकारी शाळे बदला खाजगी शाळांनी धाडटात. ताचो परिणाम म्हूण कांय मुळाव्यो शाळा सरकाराक बंद करच्यो पडटात.
फाटल्या वर्सां अशाच कारणांक लागून मराठी माध्यमाच्यो सात आनी कोंकणी माध्यमाची एक मेळून आठ मुळाव्यो शाळा बंद करच्यो पडल्यो. अंदूं एक शिक्षकी तशेंच विद्यार्थ्यांची संख्या उणी आशिल्ल्यो शाळा बंद करपा बदला त्यो लागसारच्या शाळांनी विलीन करून शाळांचो दर्जो वाडोवपाचो तशेंच विद्यार्थ्यांक गरजेच्यो सगल्यो सुविधा उपलब्ध करून दिवपाचो निर्णय सरकारान घेतला. ते उपरांत शिक्षण खात्यान फाटल्या दोन म्हयन्यां पसून अशा शाळांचो सर्वे सुरू केला. दोन दिसां पयलीं शिक्षण संचालकांनी सगल्याच म्हालांतल्या सहाय्यक जिल्हो शिक्षण निरिक्षकांक (एडीईआय) हे विशीं शिक्षकां कडेन बसका घेवपाक सांगिल्लें. तशेंच शिक्षकांनी पालकां कडेन हे विशीं बसका घेवन तांकां विस्वासांत घेवचे, अशी सुचोवणी केल्ली.
शाळांच्या विलिनीकरणाची कित्याक गरज आसा, हे पालकांक समजावन सांगचें. विलिनीकरण जावपी शाळांतल्या विद्यार्थ्यां खातीर सरकारा कडल्यान बालरथ मेळटले. लागसारच्या शाळांनी विलिनीकरण जाले उपरांत थंय विद्यार्थ्यांक उत्कृश्ट साधन-सुविधा उपलब्ध करून त्या शाळांचो दर्जो वाडोवपाचो सरकार यत्न करतले, अशी हमी पालकांक दिवपाचे निर्देश दिल्ले. ते प्रमाण शिक्षकांनी पालकां कडेन बसका घेतल्यो. पूण ते उपरांतूय पालकांनी सरकाराच्या ह्या निर्णयाक तेंको दिवपा बदला विरोधच करपाक सुरवात केल्या. ताका लागून पालकांची समजूत काडपाक शिक्षण खात्याक अपेस आयिल्ल्याचे दिसून येता.
पेडणें म्हालांतल्या भाटवाडी, कोरगांव, पार्सें, सत्तरी म्हालांतल्या बाराजण तशेंच सोनाळ गांवांतल्या शाळेच्या विलिनीकरणाक पालकांनी विरोध केला. खंयचेच स्थितींत आमी विलिनीकरण करपाक दिवचे नात अशें तांणी म्हणलां.
सरकाराच्या निर्णयाक विरोध करपी निवेदन तांणी भागशिक्षणाधिकाऱ्यांक भेटयलां. तशेंच सरकार शाळांच्या विलिनीकरणाचेर ठाम रावल्यार आपल्या भुरग्यांक खाजगी शाळांनी घालपाचो निर्णय कांय पालकांनी घेतला.
आंगणवाडींच्या दत्तक निर्णया विशीं
महिला आनी बाल कल्याण काळखांत
नव्या शिक्षण धोरणा प्रमाण माध्यमीक, उच्च माध्यमीक शाळांनी एक आंगणवाडी पोसकी (दत्तक) घेवची, अशें परिपत्रक मंगळारा शिक्षण खात्यान जारी केलां. पूण परिपत्रक जारी करपा पयलीं खात्यान आंगणवाडींची जापसालदारकी आशिल्ल्या महिला आनी बाल कल्याण खात्याचे मंत्री, सचीव तशेंच संचालकांक विस्वासांत घेवंक ना. तशेंच हे विशीं तांचे कडेन चर्चाय करूंक नाशिल्ल्याची म्हायती गोपां कडल्यान मेळ्ळ्या. महिला आनी बाल कल्याण खात्याचे परवानगे खेरीत शिक्षण खात्यान असो निर्णय घेतिल्ल्यान खात्याच्या वरिश्ठ अधिकाऱ्यां मदीं नाराजी पातळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
